பழுதான 'அம்ருத்' திட்ட சாலைகள் பராமரிப்பு பணிகளில் தொய்வு ஏன்?

கடந்த, 2022ல் 'அம்ருத்' திட்டத்தின் கீழ், பல கோடி ரூபாய் நிதி ஒதுக்கீடு செய்யப்பட்டு, அந்தந்த மாநகராட்சி நிர்வாகங்களின் வாயிலாக, குடிநீர் மேம்பாட்டு திட்டப்பணிகள் மற்றும் பாதாள சாக்கடை பணி மேற்கொள்ளப்பட்டது. திட்டப்பணியை குறிப்பிட்ட காலத்துக்குள் முடித்தாக வேண்டிய நிலையில், தேர்ந்தெடுக்கப்பட்ட பணிகளை, மாநகராட்சி நிர்வாகங்கள் 'விறுவிறு'வென முடித்தன.
அவ்வாறு, புதுப்பிக்கப்பட்ட சாலையோரம் தான், குடிநீர் குழாய், பாதாள சாக்கடைக்கான குழாய் பதிக்கப்பட்டுள்ள நிலையில், அவற்றில் அடிக்கடி ஏற்படும் பழுது, கசிவு ஆகியவற்றை சரி செய்ய, சாலையை தோண்டும் பணியை மாநகராட்சி நிர்வாகங்கள் மேற்கொண்டன. தோண்டப்பட்ட சாலையை செப்பனிடும் பொறுப்பு, நெடுஞ்சாலைத்துறைக்கே உண்டு என்ற போதிலும், அதற்கான செலவின தொகையை மாநகராட்சி நிர்வாகங்கள், செலுத்த வேண்டும். விதிமுறைப்படி, சாலையை தோண்ட முன்கூட்டியே நெடுஞ்சாலைத்துறை அனுமதி பெற்று, அதற்கான இழப்பீடு தொகையை செலுத்திய பின்னர் தான், சாலையை தோண்டும் பணியை மாநகராட்சி நிர்வாகத்தினர் மேற்கொள்ள வேண்டும்.
ஆனால், உள்ளாட்சி நிர்வாகத்தினர், நெடுஞ்சாலைத்துறையிடம் எவ்வித அனுமதியையும் பெறாமல், இழப்பீடு தொகையையும் செலுத்தாமல், சாலையை தோண்டி பணி மேற்கொண்டனர். அவ்வாறு தோண்டப்பட்ட சாலைகள் மீண்டும்மீண்டும் தோண்டப்படுவதால், பழுது பார்க்கப்படாததால், பல இடங்களில் சாலை சிதிலமடைந்து, விபத்து மற்றும் நெரிசலை ஏற்படுத்தி வருகிறது.