திருப்பூர்:'தினமலர்' நாளிதழ் சார்பில் இன்ஜினியரிங் கவுன்சிலிங் வழிகாட்டி நிகழ்ச்சி, நாளை மறுதினம் (7 ம் தேதி), திருப்பூர் வித்யா கார்த்திக் திருமண மண்டபத்தில் நடக்கிறது.

பி.இ., பி.டெக்., முதலாமாண்டு மாணவர் சேர்க்கைக்கு, அண்ணா பல்கலைக்கழக இணைப்பில் உள்ள இன்ஜினியரிங் கல்லுாரிகளில் ஆன்லைனில் கவுன்சிலிங், தமிழக அரசு சார்பில் நடத்தப்பட உள்ளது.

இதில் பங்குபெறும் மாணவ, மாணவியர் தங்களுக்கு விருப்பமான கல்லுாரி மற்றும் பாடப்பிரிவை தேர்வு செய்வதற்கான வழிமுறை குறித்து 'தினமலர்' நாளிதழ் வழிகாட்ட உள்ளது.

இதற்காக, சென்னை இன்ஸ்டிடியூட் ஆப் டெக்னாலஜி கல்லுாரியுடன் இணைந்து, தினமலர் நாளிதழ் 'டி.என்.இ.ஏ., இன்ஜினியரிங் கவுன்சிலிங் வழிகாட்டி - 2024' என்ற நிகழ்ச்சியை, தமிழகம் முழுதும் நடத்தி வருகிறது.

சந்தேகம் தீரும்!

இந்நிகழ்ச்சியில், வேலைவாய்ப்பு மிகுந்த இன்ஜினியரிங் பாடப்பிரிவு, ஆன்லைன் கவுன்சிலிங் விதிமுறைகள், சிறந்த கல்லுாரிகள் மற்றும் பாடப்பிரிவை தேர்வு செய்வது எப்படி, 'கட் ஆப்' மதிப்பெண்ணின் முக்கியத்துவங்கள், தரவரிசை மற்றும் விருப்ப பாடப்பிரிவை தேர்வு செய்வது உள்ளிட்ட தலைப்புகளில், மாணவர்களின் பல்வேறு சந்தேகங்களுக்கு கல்வியாளர்கள், நிபுணர்கள் சிறப்பாக விளக்கம் தர உள்ளனர்.

அத்துடன், நிகழ்ச்சியில், இந்தாண்டு எந்த படிப்புக்கு மவுசு அதிகம், என்ன பாடப்பிரிவுக்கு என்ன எதிர்காலம் உள்ளது, கோர் இன்ஜினியரிங் படிப்புக்கான கொட்டி கிடக்கும் வாய்ப்புகள் எப்படி, சிறந்த கல்லுாரியை தேர்வு செய்ய என்ன செய்ய வேண்டும் என்பது குறித்தும் விரிவான விளக்கம் தரப்படுகிறது.

திருப்பூர், தாராபுரம் ரோடு, வித்யாகார்த்திக் திருமண மண்டபத்தில் வரும், 7 ம் தேதி (நாளை மறுதினம்), காலை, 10:00 மணி முதல் மதியம், 1:00 மணி வரை நிகழ்ச்சி நடக்கிறது. இந்நிகழ்ச்சியில், தமிழக இன்ஜினியரிங் கவுன்சிலிங் கமிட்டி செயலர் புருேஷாத்தமன் மற்றும் கல்வி ஆலோசகர் அஸ்வின் ஆகியோர், மாணவ, மாணவியருக்கு தேவையான, விரிவான தகவல்களை வழங்கி, வழிகாட்டுகின்றனர்.

'தினமலர்' நாளிதழுடன், இன்ஜினியரிங் கவுன்சிலிங் வழிகாட்டி நிகழ்ச்சியை கோவை ஸ்ரீ ஈஸ்வர் பொறியியல் கல்லுாரி, கற்பகம் கல்வி நிறுவனங்கள் இணைந்து வழங்குகின்றன. இன்ஜி., கவுன்சிலிங் விண்ணப்பித்த மாணவர்கள் இப்போதே தயாராகுங்கள். வரும் ஞாயிறு சந்திப்போம்.