மதுரை; தென்காசி மாவட்டம் சிவகிரி அருகே தமிழகம்-கேரளா தேசிய நெடுஞ்சாலையில் சேதமடைந்துள்ள ஆலமரங்கள் பயணிகளுக்கு அச்சுறுத்தலாக இருப்பதாக ஆய்வில் உறுதியானால் அகற்றப்படும் என என்.எச்.ஏ.ஐ.,தரப்பில் உயர்நீதிமன்ற மதுரைக் கிளையில் தெரிவிக்கப்பட்டது.

சிவகிரி பகுதியை சேர்ந்த கருணாலய பாண்டியன், தங்கராஜ் தாக்கல் செய்த மனு:

சிவகிரி அருகே சுப்பிரமணியபுரத்தில் குறிப்பிட்ட சர்வே எண்ணில் ஆலமரங்கள் உள்ளன. இவை தமிழகம்- -கேரளா செல்லும் தேசிய நெடுஞ்சாலையை ஆக்கிரமித்துள்ளன. இவை சேதமடைந்து ஆபத்தை ஏற்படுத்தும் நிலையில் உள்ளன. மரங்களை அகற்றக்கோரி கலெக்டர், நாகர்கோவில் தேசிய நெடுஞ்சாலை ஆணையம் (என்.எச்.ஏ.ஐ.,) திட்ட இயக்குனர், திருநெல்வேலி மாவட்ட வன அலுவலருக்கு மனு அனுப்பினோம். நடவடிக்கை இல்லை. பரிசீலிக்க உத்தரவிட வேண்டும்.

இவ்வாறு குறிப்பிட்டார்.

நீதிபதி வி.லட்சுமிநாராயணன் விசாரித்தார்.

என்.எச்.ஏ.ஐ., தரப்பு: மரங்களை ஆய்வு செய்யுமாறு மாவட்ட வன அலுவலருக்கு கடிதம் எழுதப்பட்டுள்ளது. பயணிகளுக்கு அச்சுறுத்தலாக இருப்பது ஆய்வில் கண்டறியப்பட்டால் சட்ட நடைமுறைகளை பின்பற்றி அம்மரங்கள் அகற்றப்படும்.

இவ்வாறு தெரிவித்தது.

இதை பதிவு செய்த நீதிபதி: ஏற்கனவே சம்பந்தப்பட்ட அதிகாரிகளால் நடவடிக்கை துவங்கப்பட்டுள்ளது. மேலும் உத்தரவு பிறப்பிக்கத் தேவையில்லை. வழக்கு பைசல் செய்யப்படுகிறது.

இவ்வாறு உத்தரவிட்டனர்.