சேலம் : பெங்களூரு-மதுரை வந்தேபாரத் ரயில், சோதனை ஓட்டம் நேற்று நடத்தப்பட்டது.

பெங்களூருவிலிருந்து தென் மாநிலங்களுக்கு செல்வதற்காக, தினமும் ஆயிரக்கணக்கான பயணிகள் மதுரை செல்கின்றனர். இவர்களுக்கு வசதியாக வந்தேபாரத் ரயில் இயக்கப்பட வேண்டும் என, கோரிக்கை எழுந்து வந்தது.இந்நிலையில், பகல் நேர ரயிலாக பெங்களூரு - மதுரை - பெங்களூரு வந்தேபாரத் ரயில் அறிவிக்கப்பட்டுள்ளது. மதுரையிலிருந்து காலை, 5:15 மணிக்கு கிளம்பி, 7:15 க்கு திருச்சி, 9:55க்கு சேலம், மதியம், 1:15 மணிக்கு பெங்களூரு செல்லவும், மறு மார்க்கத்தில், மதியம், 1:45 மணிக்கு பெங்களூருவிலிருந்து கிளம்பி, மாலை, 5:00 மணிக்கு சேலம், இரவு, 8:20க்கு திருச்சி, 10:25 மணிக்கு மதுரை செல்ல திட்டமிடப்பட்டுள்ளது.இதற்கான சோதனை ஓட்டம் நேற்று காலை நடந்தது. சேலத்துக்கு காலை, 9:55 மணிக்கு வரும் என எதிர்பார்க்கப்பட்ட ரயில், 9:18 மணிக்கு வந்து சேர்ந்தது.ரயில்வே அலுவலர்கள், பணியாளர்கள், மலர் துாவி ரயிலுக்கு வரவேற்பு அளித்தனர். பலரும் செல்பி எடுத்து கொண்டனர். பின் ரயில் பெங்களூரு கிளம்பி சென்றது.