தொண்டி: தொண்டி அருகே நம்புதாளையில் வி.ஏ.ஓ., அலுவலகம், துணை சுகாதார நிலையம், கிராம சேவை மையம், மீனவ மகளிர் சேவை ஆகிய நான்கு அலுவலகங்களுக்கு தினமலர் நாளிதழ் செய்தி எதிரொலியாக மின்வசதி செய்யப்பட்டது.

தொண்டி அருகே நம்புதாளை ஊராட்சி அலுவலக வளாகத்தில் ஊராட்சி அலுவலகம், வி.ஏ.ஓ., அலுவலகம், துணை சுகாதார நிலையம், கிராம சேவை மையம், மீனவ மகளிர் சேவை ஆகிய அலுவலகங்கள் இயங்கி வந்தன. இந்த அலுவலகங்களுக்கு ஊராட்சி அலுவலகத்தில் இருந்து மின் சப்ளை செய்யப்பட்டது. இந்நிலையில் சில நாட்களுக்கு முன்பு புதிய ஊராட்சி அலுவலக கட்டடம் கட்டப்பட்டு அங்கு ஊராட்சி அலுவலகம் மாற்றப்பட்டது.

இதனால் பழைய ஊராட்சி அலுவலகத்தில் இருந்து மின்சப்ளை தொடர்பு துண்டிக்கப்பட்டு புதிய ஊராட்சி அலுவலகத்திற்கு மின் இணைப்பு கொடுக்கப்பட்டது. மின்சாரம் இல்லாததால் நான்கு அலுவலகங்களும் இருளில் மூழ்கியது. அலுவலர்கள் பகல் நேரத்திலும் வேலை செய்ய முடியாமல் தவித்தனர். மழைக் காலங்களில் கதவை மூடிவிட்டால் வெளிச்சமே இருக்காது.

நான்கு அலுவலகங்களுக்கும் பல்வேறு வேலையாக வருபவர்களும் பாதிக்கப்பட்டனர்.

இந்த அலுவலகங்களுக்கு மின் சப்ளை வழங்க சம்பந்தப்பட்ட அதிகாரிகள் நடவடிக்கை எடுக்க வேண்டும் என்று தினமலர் நாளிதழில் செய்தி வெளியானது. இதன் எதிரொலியாக நான்கு அலுவலகங்களுக்கும் நேற்று முன்தினம் முதல் மின் வசதி ஏற்படுத்தப்பட்டது.