குன்னுார்:'ஆன்லைனில்' டிரிம்மர் மிஷின் வாங்க ஆர்டர் செய்தவருக்கு, ஜல்லிக்கற்கள் வந்ததால் அதிர்ச்சி அடைந்தார்.

நீலகிரி மாவட்டம், குன்னுார் மேல் கடைவீதி பகுதியைச் சேர்ந்தவர் காஜா. இவர் சில நாட்களுக்கு முன், ஆன்லைனில், டிரிம்மர் மிஷின் வாங்க ஆர்டர் செய்தார்.

கூரியரில் டெலிவரி செய்தபோது, எடையளவில் சந்தேகமடைந்த அவர் பார்சலை பிரித்து பார்த்தார்.

அதில், பார்சலுக்குள் வெறும் ஜல்லிக்கற்கள் இருந்ததால் அதிர்ச்சி அடைந்தார். பிரிக்கும்போது வீட்டில் இருந்தவர்கள் 'வீடியோ' எடுத்து பதிவிட்டுள்ளனர்.

கூரியர் நிறுவன ஊழியர்கள் கூறுகையில், 'சம்பந்தப்பட்ட ஆன்லைன் நிறுவன 'ஆப்'களின் வாயிலாக ஆர்டர் செய்யாமல், 'பேஸ்புக்' உள்ளிட்ட சமூக வலைதளங்களில் வரும் 'லிங்க்'குகளை கிளிக் செய்து ஆர்டர் செய்வதால் இதுபோன்ற நிலை ஏற்பட வாய்ப்பு உள்ளது' என்றனர்.