மதுரை: சென்னை எழும்பூர் - நாகர்கோவில் வந்தே பாரத் ரயில் (20627) தொழில்நுட்பக் கோளாறு காரணமாக 2 மணி நேரம் தாமதமாக புறப்பட்டதால் பயணிகள் அவதிக்குள்ளாகினர்.

எழும்பூர் - நாகர்கோவில் இடையே புதன் தவிர்த்து தினமும் 16 பெட்டிகள் கொண்ட வந்தே பாரத் ரயில் இயக்கப்படுகிறது. எழும்பூரில் இருந்து அதிகாலை 5:00 மணிக்கு புறப்படும் ரயில் (20627) தாம்பரம், விழுப்புரம், திருச்சி, திண்டுக்கல், மதுரை, கோவில்பட்டி, திருநெல்வேலி வழியாக மதியம் 1:50 மணிக்கு நாகர்கோவில் செல்கிறது. மறுமார்க்கம் மதியம் 2:20 மணிக்கு புறப்படும் ரயில் (20628) இரவு 11:00 மணிக்கு எழும்பூர் செல்கிறது.

இந்நிலையில் எழும்பூரில் இருந்து நேற்று அதிகாலை 5:00 மணிக்கு புறப்பட வேண்டிய ரயில் 2 மணி நேரம் தாமதமாக காலை 7:00 மணிக்கு புறப்பட்டது. மறுமார்க்கத்திலும் 2 மணி நேரம் தாமதமாக மாலை 4:20 மணிக்கு எழும்பூர் புறப்பட்டுச் சென்றது. இதனால் குறித்த நேரத்திற்கு செல்ல முடியாமல் பயணிகள் அவதிக்குள்ளாகினர்.

ஒரு பெட்டியின் 'போகி' எனும் சக்கரத் தொகுப்பை மாற்றம் செய்ய வேண்டியிருந்ததால் நாகர்கோவில் வந்தே பாரத் ரயில் புறப்படுவதில் தாமதம் ஏற்பட்டதாக ரயில்வே தரப்பில் தெரிவிக்கப்பட்டது.