சரிசெய்ய வேண்டும்

கோரிப்பாளையம் சந்திப்பில் பாலப்பணிகளுக்காக போக்குவரத்தை மாற்றி அமைப்பதால், வைகை நதியின் வடபகுதிக்கும், தென்பகுதிக்கும் வாகனங்கள் மாற்றுப் பாதையில் செல்லும். இதனால் கோரிப்பாளையம் பகுதியில் பந்தல்குடி, செல்லுார், ஓ.சி.பி.எம்., பள்ளி, ஜம்புரோபுரம் பகுதிகளிலும், அண்ணா பஸ்ஸ்டாண்ட் முதல் வைகை வடகரையில் ஆசாரி தோப்பு மற்றும் செனாய்நகர், மதிச்சியம் பகுதி ரோடுகளிலும் வாகனங்கள் செல்லும்.இந்த பகுதி ரோடுகள் மிகவும் மோசமாக உள்ளன. இதில் வாகனங்கள் 'தடதட'த்துச் சென்று திரும்புவதற்குள் போதும், போதுமென்றாகிவிடும். பாலப்பணிகள் பல மாதங்கள் நடக்கும் என்பதால், வடகிழக்கு பருவமழை காலங்களில் இந்த ரோடுகளில் செல்லவே முடியாத நிலை ஏற்படும். அப்போது நகரின் வடபகுதியில் போக்குவரத்து ஸ்தம்பித்து விடும். எனவே முன்னெச்சரிக்கையாக இந்த துணை ரோடுகளை இப்போதே சீர்படுத்தி தயாராக வைத்துக் கொள்வது மாநகராட்சி, நெடுஞ்சாலைத்துறையினரின் கடமை.