மதுரை: தீபாவளி பண்டிகையை முன்னிட்டு மதுரையில் தற்காலிக பட்டாசு கடை அமைக்கும் வழிமுறைகளை கமிஷனர் லோகநாதன் வெளியிட்டுள்ளார்.

அவரது அறிக்கை: கடை அமைக்க விருப்பமுள்ளோர் இணைய தளத்தில் விண்ணப்பப் படிவம் ஏ.இ.5 ஐ பதிவிறக்கம் செய்ய வேண்டும். அதனை பாஸ்போர்ட் சைஸ் போட்டோ, ரூ.20 நீதிமன்ற அஞ்சல் வில்லையுடன் பூர்த்தி செய்ய வேண்டும். கூடுதலாக 2 பாஸ்போர்ட் சைஸ் போட்டோக்கள், தீயணைப்புத்துறை தடையில்லாச் சான்று, 2 வழிகளுடன் கூடிய கடையின் வரைபடம், கடை இருப்பிடத்தை சுற்றி 50 மீ., அருகிலுள்ள அமைவிடங்களின் வரைபடம், கடை முகவரி, விண்ணப்பதாரர் கையொப்பம் இடம்பெற வேண்டும்.

சொந்த கட்டடம் எனில் 2024--2025ம் ஆண்டின் முதல் அரையாண்டு வரையான சொத்து வரி ரசீது, உரிமையாளர் சம்மதக் கடிதம், வாடகை கட்டடம் எனில், 2024--2025 ஆண்டுக்குரிய முதல் அரையாண்டு வரையான சொத்து வரி ரசீது, கட்டட உரிமையாளரின் சம்மத கடிதம், வாடகை ஒப்பந்த பத்திரம் வேண்டும்.

மாநகராட்சி / பொதுப்பணித்துறை / மற்ற துறை கட்டடமாக இருப்பின் அத்துறை சார்ந்த அலுவலரின் தடையில்லா சான்று வேண்டும்.

மாநகராட்சி டி மற்றும் ஓ ரசீது, உறுதி ஆவணம், பத்திரத்தில் நோட்டரி வழக்கறிஞர் ஒப்புதல் வேண்டும். கடை அமைய உள்ள இடத்தின் போட்டோக்கள் 2 வெவ்வேறு கோணங்களில் இருக்க வேண்டும். விண்ணப்பதாரரின் குடும்ப அட்டை அல்லது ஆதார் அட்டை நகல் வேண்டும்.

ரூ.900 விண்ணப்ப உரிமம் கட்டணம். அசல் விண்ணப்பத்துடன் அனைத்து ஆவணங்களின் 3 நகல்களை இணைக்க வேண்டும்.

செப். 4 மதியம் 1:00 மணி வரை விண்ணப்பிக்கலாம். கடை நடத்தும் இடங்களை ஆய்வு, விசாரணை செய்து, திருப்தி அடைந்தால் உரிமம் வழங்கப்படும்.

சாலை ஓரக் கடைகளுக்கு உரிமம் கிடையாது. முழுமையில்லாத விண்ணப்பங்கள் தள்ளுபடி செய்யப்படும் என தெரிவித்துள்ளார்.