கிருஷ்ணகிரி, கிருஷ்ணகிரி மாவட்டம், போச்சம்பள்ளி ஒழுங்குமுறை விற்பனை கூடத்தில், நேற்று இ-நாம் முறையில் கொப்பரை தேங்காய் ஏலம் நடந்தது. இதில், 2,579 கிலோ கொப்பரை தேங்காய்கள், கிலோ ஒன்றுக்கு அதிகபட்சம், 235 ரூபாய்க்கும், குறைந்தபட்சம், 105.99 ரூபாய்க்கும், சராசரியாக கிலோ ஒன்று, 210 ரூபாய்க்கும் விற்பனையானது. அதன்படி, 5.16 லட்சம் ரூபாய்க்கு கொப்பரை ஏலம் நடந்தது.

இது குறித்து, போச்சம்பள்ளி ஒழுங்குமுறை விற்பனைக்கூட கண்காணிப்பாளர் அருள்வேந்தன் கூறுகையில், ''இங்கு தேசிய மின்னணு வேளாண் சந்தை (இ-நாம்) முறையில், விவசாய விளைப் பொருட்கள் விற்பனை செய்யப்படுகிறது. இந்த ஏலத்தில் பல்வேறு மாவட்டங்களில் இருந்து வியாபாரிகள் பங்கேற்றனர். இந்த ஏலத்தில் கொப்பரை தேங்காய்கள் நல்ல விலைக்கு விற்பனையானது. அதற்கான தொகைகள் உடனே விவசாயிகளின் வங்கிக் கணக்கில் செலுத்தப்பட்டது. மேலும், கொப்பரை, பருத்தி மட்டுமின்றி நெல் ஏலமும் மின்னணு வர்த்தக முறையில் நடக்க உள்ளதால், நெல் விவசாயிகள் இந்த வாய்ப்பை பயன்படுத்திக் கொள்ளலாம்,'' என்றார்.