பெ.நா.பாளையம்,; பெரியநாயக்கன்பாளையத்தில் உள்ள, ராமகிருஷ்ண மிஷன் வித்யாலயா உள்விளையாட்டு அரங்கில், டெக்ஸ்மோ கோப்பை மாநில அளவிலான வாலிபால் போட்டிகள், வரும் 28ம் தேதி துவங்குகிறது.

இங்கு அக்வா குரூப் டெக்ஸ்மோ கோப்பை, 54வது ஆண்டு மாநில அளவிலான வாலிபால் போட்டி, 28ம் தேதி தொடங்கி ஜூன், 1ம் தேதி வரை பெரியநாயக்கன்பாளையம் ராமகிருஷ்ண மிஷன் வித்யாலயா வளாகத்தில் உள்ள, வெங்கடகிருஷ்ணன் உள்விளையாட்டு அரங்கில் நடக்கிறது.

மாநில அளவிலான 'லீக்' முறை வாலிபால் போட்டியில், இந்தியன் வங்கி, இந்தியன் ஓவர்சீஸ் வங்கி, தமிழக காவல்துறை, அக்வா பம்ப் ஸ்போர்ட்ஸ் கிளப் மற்றும் சுங்கத்துறை அணிகள் பங்கேற்கின்றன. இப்போட்டிகள் தினமும் மாலை, 5:30 மணிக்கு துவங்கும்.

அக்வா டெக்ஸ் கோப்பைக்கான மாவட்ட அளவிலான போட்டியில், கோவை மாவட்டத்தைச் சேர்ந்த, 32 அணிகள் கலந்து கொள்கின்றன.

மாவட்ட அளவிலான போட்டிகள் 29, 30, 31 ஆகிய தேதிகளில் காலை, 8:00 முதல் மாலை, 5:00 மணி வரை, உள் விளையாட்டு அரங்கில் நடக்கிறது.

இப்போட்டிகளை, 'நாக்அவுட்' முறையில் நடத்த ஏற்பாடுகள் செய்யப்பட்டுள்ளன. அனைத்து போட்டிகளையும் காண அனுமதி இலவசம்.