இதையும் கொஞ்சம் கவனியுங்க!

பொள்ளாச்சி ரயில் பயணியர் நலச்சங்கத்தினர், ரயில்வே அதிகாரிகளுக்கு அனுப்பியுள்ள மனுவில், 'தினமும் காலை, 10:20மணிக்கு பொள்ளாச்சியில் இருந்து கோவை செல்லும் மதுரை - கோவை ரயில், கோவைக்கு, 11:20மணிக்கு சென்றடையும் படி வேகத்தை அதிகப்படுத்த வேண்டும். இதன் வாயிலாக, 11:50 மணிக்கு கோவையில் இருந்து மேட்டுப்பாளையம் செல்லும் ரயிலை பிடிக்க பயணியருக்கு வசதியாக இருக்கும். அதே போன்று, பொள்ளாச்சியில் இருந்து இரவு, 8:55 மணிக்கு கோவை புறப்படும் ரயில் வேகத்தை அதிகப்படுத்தினால், திருச்செந்துார் ரயிலில் வரும் பயணியர், கோவை செல்ல வசதியாகவும், பொள்ளாச்சி ரயில் பயணியர், கோவையில் இருந்து சென்னை, பெங்களூரு செல்லும் ரயில்களில் பயணிக்கவும் உதவியாக இருக்கும்.
கோவை - பெங்களூரு உதய் டபுள் டக்கர் ரயிலை பொள்ளாச்சியில் இருந்தோ அல்லது பொள்ளாச்சி வழியாகவோ இயக்க வேண்டும். எர்ணாகுளம் - பாலக்காடு மெமு பயணியர் ரயிலை 'ஆனைமலை ரோடு' ஸ்டேஷனில் நிறுத்தத்துடன், பொள்ளாச்சி வரை நீட்டிக்க வேண்டும். பொள்ளாச்சியில் இருந்து கிணத்துக்கடவு, ஈரோடு, சேலம், காட்பாடி வழியாக சென்னைக்கு இரவு நேர தினசரி ரயில் இயக்க வேண்டும். இவ்வாறு, தெரிவித்துள்ளனர்.