பொள்ளாச்சி; 'தினமலர்' நாளிதழ் சார்பில், இன்ஜினியரிங் கவுன்சிலிங் வழிகாட்டி நிகழ்ச்சி, பொள்ளாச்சியில் இன்று நடக்கிறது.

தமிழக அரசு, தொழில்நுட்ப கல்வி இயக்கக இணையதளமான டி.என்.இ.ஏ., வாயிலாக, இன்ஜி., படிப்புகளுக்கான சேர்க்கையை நடத்துகிறது. அண்ணா பல்கலை கல்லுாரிகள், அரசு மற்றும் அரசு உதவி பெறும் இன்ஜினியரிங் கல்லுாரிகளில் உள்ள, இளநிலை பட்டப்படிப்புகளுக்கான இடங்களும், தனியார் இன்ஜினியரிங் கல்லுாரிகளில் உள்ள, அரசு ஒதுக்கீட்டு இடங்களும், கவுன்சிலிங் வாயிலாக நிரப்பப்படுகின்றன.

இன்ஜினியரிங் படிப்பை தேர்வு செய்துள்ள மாணவர்களுக்கு பல்வேறு குழப்பங்கள் இருக்கும். இன்ஜினியரிங்கில் எந்த துறையை தேர்வு செய்வது, எந்த இன்ஜி., படிப்புக்கு சிறந்த எதிர்காலம் இருக்கும் என்ற சந்தேகம், பெற்றோருக்கும், மாணவர்களுக்கும் உள்ளது. என்ன தான் 'ஆன்லைன்' வாயிலாக, சந்தேகங்களை நிவர்த்தி செய்து கொண்டாலும், முழுதிருப்தி ஏற்படுவதில்லை.

மாணவர்கள், பெற்றோரின் இக்குழப்பத்தை தீர்க்கவே, 'தினமலர்' நாளிதழ் சார்பில், இன்ஜினியரிங் கவுன்சிலிங், 2025 வழிகாட்டி நிகழ்ச்சி, பொள்ளாச்சி மாதவா இன் ேஹாட்டலில் இன்று மாலை, 3:00 முதல் 6:00 மணி வரை நடக்கிறது.

கற்பகம் இன்ஸ்டிடியூசன்ஸ், ஸ்ரீ ஈஸ்வர் காலேஜ் ஆப் இன்ஜினியரிங், சேரன் குரூப் ஆப் இன்ஸ்டிடியூசன்ஸ் இணைந்து நடத்தும் இந்நிகழ்ச்சியில், தமிழ்நாடு இன்ஜினியரிங் கவுன்சிலிங் குறித்த அனைத்து சந்தேகங்களுக்கும் கல்வியாளர்கள் நேரடி விளக்கம் அளிக்கின்றனர். நிகழ்ச்சியில் பங்கேற்க அனுமதி இலவசம்.

அத்துடன், இந்தாண்டு எந்தெந்த படிப்புகளுக்கு வரவேற்பு உள்ளது, எந்தெந்த பாடங்களுக்கு என்ன எதிர்காலம், கோர் இன்ஜினியரிங் படிப்புகளுக்கான வாய்ப்புகள், சிறந்த கல்லுாரியை தேர்வு செய்வது உள்ளிட்ட அனைத்து சந்தேகங்களுக்கும் விளக்கம் அளிக்கப்படுகிறது.

நிகழ்ச்சியில், 'வாய்ப்புகள் மிகுந்த இன்ஜினியரிங் பிரிவுகள்' எனும் தலைப்பில், கல்வி ஆலோசகர் அஸ்வின், 'இன்ஜினியரிங் கவுன்சிலிங் நடைமுறைகள்' குறித்து தமிழ்நாடு பொறியியல் சேர்க்கை செயலர் புருஷோத்தமன் ஆகியோர் விரிவான ஆலோசனைகளை வழங்க உள்ளனர்.

மாணவர்களே... இன்ஜி., கனவை நனவாக்க, சிறந்த படிப்பு, கல்லுாரியை தேர்வு செய்யவும், கவுன்சிலிங் நடைமுறைகளை அறிந்து கொள்ளவும், இன்று நடக்கும் வழிகாட்டி நிகழ்ச்சியை மிஸ் பண்ணிடாதீங்க!