கோவை;மாவட்ட அளவிலான சி டிவிஷன் கால்பந்து லீக் போட்டியில் ஏ.ஜே.கே., ஸ்ட்ரைக்கர்ஸ் அணி முதல் வெற்றியை பதிவு செய்தது.

கோவை மாவட்ட கால்பந்து சங்கம் சார்பில், மாவட்ட அளவிலான கால்பந்து லீக் போட்டி நவக்கரை ஏ.ஜே.கே., கலை அறிவியல் கல்லுாரியில் துவங்கியது. போட்டியை பாரதியார் பல்கலை துணை வேந்தர் பொறுப்புக்குழு உறுப்பினர் அஜீத்குமார் லால் மோகன் துவக்கி வைத்தார்.

இதன் சி டிவிஷன் கால்பந்து லீக் முதல் போட்டியில் இந்து முஸ்லிம் கால்பந்து கிளப் மற்றும் ஏ.ஜே.கே., ஸ்ட்ரைக்கர்ஸ் கால்பந்து கிளப் அணிகள் மோதின. இப்போட்டியில் சிறப்பாக விளையாடிய ஏ.ஜே.கே., அணியின் இளம் வீரர்கள் 1 - 0 என்ற கோல் கணக்கில் வெற்றி பெற்று சி டிவிஷனில் முதல் வெற்றியை பதிவு செய்தனர்.

இரண்டாம் போட்டியில் ஏ.ஜே.கே., கலை அறிவியல் கல்லுாரி எப்.சி., அணி 4 - 0 என்ற கோல் கணக்கில் நெய்விலை எப்.சி., அணியை வீழ்த்தியது. ஏ.ஜே.கே., கல்லுாரி அணிக்கு பாலு இரண்டு கோல், அகாஷ் மற்றும் ஷானு ஆகியோர் தலா ஒரு கோல் அடித்து வெற்றிக்கு உதவினர்.