கவர்மென்ட் கொடுக்குது; கருவூலகம் தடுக்குது!

பெதப்பம்பட்டி நால்ரோடு பகுதியில பஸ்க்கு காத்திருந்த விவசாயிகள், மானியம் கைக்கு வர்றதுக்குள்ள, வெள்ளாமையே எடுத்துறலாம் போல என புலம்பிக்கொண்டிருந்தனர்.என்னவென விசாரித்தால், 'வேளாண், தோட்டக்கலை என எல்லாத்துறைகளிலும், ஏகப்பட்ட மானிய திட்டம் இருக்குதுங்க; அதுக்கு விண்ணப்பிக்கவே போராட வேண்டியிருக்கு.ஒரு வழியாக அப்ளிகேஷன் கொடுத்தாலும், மானியத்தொகை கைக்கு கிடைக்க ரொம்ப லேட் ஆகுதுங்க. அதுக்குள்ள கைக்காசு போட்டு வெள்ளாமையே எடுத்து முடிச்சுடலாம்.பின்னேற்பு மானியமா, தொகை வரவும் காத்திருக்க வேண்டியிருக்கு. அதிகாரிங்க கிட்ட கேட்டா நாங்க எல்லாம் ரெடி பண்ணி அனுப்பிட்டோம். ஆனா, கருவூலத்துல, பில் பாஸ் பண்ண லேட் பண்ணறாங்க.பல தடவ விவசாயிகள் பிரச்னையை சொன்னாலும், கருவூலத்துல இருக்குற ஆபிசருங்க கண்டுக்கறது இல்லை. மாசக்கணக்குல இழுத்தடிச்சுட்டு தொகையை விடுவிக்கறாங்க.கருவூல பிரச்னை குறித்து, விவசாயிக சங்கம் சார்பில், திருப்பூர் கலெக்டர் கிட்ட நேரடியா சொன்னாத்தான் தீர்வு கிடைக்கும் போல. மேற்கத்த மழை வந்துருச்சு கிளம்பலாம் என அங்கிருந்து நகர்ந்தனர்.