கோவை : முறையான நடன நிகழ்ச்சிக்கு அனுமதியும், ஆபாச நிகழ்ச்சி நடத்துபவர்கள் மீது கைது நடவடிக்கையும் மேற்கொள்ள வேண்டும் என்று, கோவை மாவட்ட ஒட்டுமொத்த மேடை நடனக்கலைஞர்கள், கலெக்டரிடம் வலியுறுத்தியுள்ளனர்.

கோவையில், 500க்கும் மேற்பட்ட நடன கலைஞர்கள் குடும்பத்துடன் வசிக்கின்றனர். கடந்த நாற்பது ஆண்டுகளாக, கோவில் திருவிழாக்களிலும், சமய விழாக்களிலும் கலாசார சீர்கேடுகளின்றி, கண்ணியத்துடன் நிகழ்ச்சிகளை நடத்துகின்றனர்.

சென்னை உயர்நீதிமன்றம், முறையான நடன கலைஞர்களுக்கு நிகழ்ச்சிகளை நடத்த அனுமதியும், ஆபாச நிகழ்ச்சி நடத்துபவர்களை கைது செய்யவும் அறிவுறுத்தியுள்ளது. ஆபாச நடனம் நடத்துபவர்கள் மீது, பெண்கள் வன்கொடுமை சட்டம் பாயும் என்று, போலீஸ் எச்சரித்துள்ளது.

ஆனால் நடனத்துறைக்கு சம்பந்தமில்லாத சிலர், ஆபாச நிகழ்ச்சிகளை நடத்துகின்றனர். இதனால் முறையான நடன கலைஞர்களுக்கு, அவப்பெயர் ஏற்படுகிறது. அவர்கள் மீது, உயர் நீதிமன்ற உத்தரவுப்படி நடவடிக்கை மேற்கொள்ள, கோவை மாவட்ட மேடை நடனக்கலைஞர்கள், கலெக்டரிடம் மனு அளித்தனர்.