விமானத்தில் புகைப்பிடித்த பயணி போலீசில் ஒப்படைப்பு குவைத்தில் இருந்து இண்டிகோ பயணியர் விமானம், 164 பேருடன் நேற்று முன்தினம் இரவு சென்னை புறப்பட்டது. விமானத்தில், தமிழகத்தை சேர்ந்த ராஜா, 32, என்பவர் பயணம் செய்தார். இவர், விமான கழிப்பறைக்கு அடிக்கடி சென்று வந்துள்ளார். இவரிடம் சிகரெட் வாசமும் வீசியுள்ளது. இதையடுத்து, விமான பணிப்பெண்கள் ராஜாவிடம் விமானத்தில் புகைப்பிடிப்பது சட்டவிரோதம் என தெரிவித்துள்ளனர். அதை கண்டுகொள்ளாத ராஜா, மீண்டும் புகைப்பிடித்ததாக கூறப்படுகிறது. இதையடுத்து, விமானியிடம் பணிபெண்கள் தகவல் தெரிவித்தனர். விமானம் சென்னையில் தரையிறங்கியதும், சிகரெட் மற்றும் லைட்டர் ஆகியவற்றுடன் ராஜாவை பிடித்த பாதுகாப்பு அதிகாரிகள், விமான நிலைய போலீசில் ஒப்படைத்தனர். அவர்கள், இது குறித்து வழக்கு பதிவு செய்து விசாரித்து வருகின்றனர்.