சென்னை மற்றும் புறநகர் பகுதிகளில், நேற்று முன்தினம் இரவு முதல் நேற்று அதிகாலை வரை பெரும்பாலான இடங்களில் மழை கொட்டி தீர்த்தது.

சோழிங்கநல்லுாரில் 12 செ.மீ., சென்னை அடையாறு, எண்ணுார், திருவொற்றியூரில் தலா 10, கத்திவாக்கம், அண்ணா பல்கலை, கொளத்துார், செம்பரம்பாக்கத்தில் தலா, 9 செ.மீ., மழை பதிவாகியுள்ளது. சென்னை வானிலை ஆய்வு மைய இயக்குனர் பா.செந்தாமரைகண்ணன் அறிக்கை:

தமிழக கடலோர பகுதிகளின் மேல், வளி மண்டல கீழடுக்கு சுழற்சி உருவாகி உள்ளது.

இதனால், செங்கல்பட்டு, காஞ்சிபுரம், விழுப்புரம், கடலுார், ராணிப்பேட்டை, திருவண்ணாமலை ஆகிய ஆறு மாவட்டங்களில், ஒருசில பகுதிகளில் இன்று கன மழை பெய்ய வாய்ப்புள்ளது. இதே சூழல், ஆக., 11 வரை நீடிக்கும் என எதிர்பார்க்கப்படுகிறது.

சென்னையில் வானம் மேகமூட்டமாக காணப்படும், ஒருசில இடங்களில், இடி மின்னலுடன் லேசான மற்றும் மிதமான மழை பெய்ய வாய்ப்புள்ளது.

இவ்வாறு அதில் கூறப்பட்டுள்ளது.