வண்டலுார்:நம் நாளிதழ் செய்தி எதிரொலியாக, வண்டலுார், ஓட்டேரி பகுதியில், நான்கு தெருக்களில் வேகத்தடை அமைக்கும் பணி துவங்கப்பட்டது.

காட்டாங்கொளத்துார் ஒன்றியம், வண்டலூர் ஊராட்சியில் 15 வார்டுகள் உள்ளன. இங்கு 50,000க்கும் மேற்பட்ட நபர்கள் வசிக்கின்றனர்.

இதில், ஓட்டேரி பகுதி, 11வது வார்டுக்கு உட்பட்ட செல்வ விநாயகர் கோவில் தெரு, பிரதான சாலை 400 மீ., தூரம் உள்ளது. இந்த, சாலையின் இரு புறமும் சிறிய மருத்துவமனைகள், மருந்தகங்கள் உட்பட 100க்கும் மேற்பட்ட கடைகள் உள்ளன.

இந்த சாலையில் கண்மூடித்தனமான வேகத்தில் இருசக்கர வாகனங்கள் சென்றதால், தினமும் இரு நபர்களாவது விபத்தில் சிக்கி காயமடைந்தனர்.

தவிர, 12 மற்றும் 13வது வார்டுக்கு உட்பட்ட வால்மீகி தெரு, 13வது வார்டுக்கு உட்பட்ட 4வது பிரதான சாலை, 14வது வார்டுக்கு உட்பட்ட முதல் பிரதான சாலையிலும், இதே போன்று அடிக்கடி விபத்துகள் நடந்தன.

எனவே, நான்கு சாலைகளிலும் 50 மீ., துாரத்திற்கு ஒரு வேகத்தடை அமைத்தால், விபத்துகளை தவிர்க்க முடியும் என, பகுதிவாசிகள் நீண்ட நாட்களாக கோரிக்கை எழுப்பி வந்தனர்.

இது குறித்து, நம் நாளிதழ் செய்தி வெளியானது. இதையடுத்து, ஊராட்சி நிர்வாகம் சார்பில், சாலைகளை ஆய்வு செய்து, வேகத்தடை அமைக்க நிதி ஒதுக்கப்பட்டது.

இந்நிலையில் நான்கு சாலைகளிலும் வேகத்தடை அமைக்கும் பணிகள் துவக்கப்பட்டு பணி நடந்து வருகிறது.