மதுராந்தகம் : மதுராந்தகம் ஒன்றியத்திற்கு உட்பட்டு பழையனுார் ஊராட்சி உள்ளது.

அங்கு, பழையனுார் சாலை, குளக்கரை, பழையனுார் கிராமம் உள்ளிட்ட பகுதிகளில் 1,000க்கும் மேற்பட்ட குடியிருப்புகள் உள்ளன.

இப்பகுதி மக்கள் செங்கல்பட்டு மற்றும் மதுராந்தகம் நகர் பகுதிகளுக்கு செல்வதற்காக, சென்னை - திருச்சி தேசிய நெடுஞ்சாலையில், படாளம் பகுதியில் உள்ள பேருந்து நிறுத்தத்தை பயன்படுத்தி வருகின்றனர்.

பள்ளி, கல்லுாரி மாணவ, மாணவியர் மற்றும் வெளியூர் பகுதிக்கு வேலைக்கு செல்வோர் என, நாள்தோறும் ஏராளமான பொதுமக்கள், 3 கி.மீ., துாரம் நடந்து சென்று, படாளம் பகுதியில் உள்ள பேருந்து நிறுத்தத்தை பயன்படுத்துகின்றனர்.

செங்கல்பட்டில் இருந்து படாளம் வழியாக தச்சூர் வரை செல்லும் தடம் எண்: டி24, டி4 மற்றும் சூனாம்பேடில் இருந்து செங்கல்பட்டு வரை இயக்கப்படும் '81வி' ஆகிய பேருந்துகளை பழையனுார் சாலை, குளக்கரை, பழையனுார் கிராமம் வழியாக இயக்க வேண்டும் என, மக்கள் கோரிக்கை விடுத்துள்ளனர்.

இதுகுறித்து, அப்பகுதியைச் சேர்ந்த சம்பத்து, 65, என்பவர் கூறியதாவது:

பழையனுார் சாலை, குளக்கரை, பழையனுார் கிராமம் வழியாக பேருந்துகள் இயக்க வேண்டும் என, துறை சார்ந்த அதிகாரிகளுக்கு பலமுறை மனு அளிக்கப்பட்டும், இதுவரை எவ்வித நடவடிக்கையும் எடுக்கப்படவில்லை.

எனவே, பழையனுார் பகுதிக்கு பேருந்து இயக்க வேண்டும். இவ்வாறு அவர் கூறினார்.