அச்சிறுபாக்கம்:ஒரத்தியிலிருந்து ஆணைக்குன்னம், எலப்பாக்கம் வழியாக, வந்தவாசி மற்றும் சோத்துப்பாக்கம் பகுதிக்கு செல்லும் மாநில நெடுஞ்சாலை உள்ளது.

இதில், ஆணைக்குன்னம் ஊராட்சி பகுதியில், எலப்பாக்கம் செல்லும் சாலை, குடியிருப்புகள் நிறைந்த பகுதி ஆகும். மேலும், வாகன போக்குவரத்தும் அதிக அளவில் இருக்கும்.

இங்கு, சாலை வளைவு மற்றும் முக்கிய சந்திப்பு பகுதிகளில், வேகத்தடை அமைக்கப்படவில்லை. இதனால், கல் குவாரி வாகனங்கள் மற்றும் கனரக வாகனங்கள் அதிவேகமாக செல்கின்றன.

அதனால், எதிரே வரும் இருசக்கர வாகன ஓட்டிகள், சாலை வளைவு பகுதிகளில் விபத்தில் சிக்கி பாதிக்கப்படுகின்றனர்.

எனவே, குடியிருப்புகள் உள்ள சாலை வளைவு பகுதிகளில், வேகத்தடை அமைக்க வேண்டும் என, அப்பகுதிவாசிகள் மற்றும் வாகன ஓட்டிகள் கோரிக்கை விடுத்துள்ளனர்.