உஹான்: சீனாவில் நடக்கும் டபிள்யு.டி.ஏ., உஹான் ஓபன் டென்னிஸ் ஒற்றையர் பிரிவு பைனலில் அமெரிக்காவின் கோகோ காப், ஜெசிகா பெகுலா மோதினர். இதில் கோகோ காப் 6-4, 7-5 என்ற நேர் செட் கணக்கில் வெற்றி பெற்று சாம்பியன் பட்டத்தை கைப்பற்றினார்.

சான்டியாகோ: சிலியில், 20 வயதுக்கு உட்பட்டோருக்கான உலக கோப்பை கால்பந்து 24வது சீசன் நடக்கிறது. இதன் காலிறுதியில் அர்ஜென்டினா அணி 2-0 என, மெக்சிகோவை வீழ்த்தியது. மற்றொரு காலிறுதியில் ஸ்பெயின் அணி 2-3 என, கொலம்பியாவிடம் அதிர்ச்சி தோல்வியடைந்தது.

தோகா: கத்தார் தலைநகர் தோகாவில் நடந்த உலக கோப்பை கால்பந்து (2026) ஆசிய அணிகளுக்கான தகுதிச் சுற்றில் யு.ஏ.இ., அணி 2-1 என, ஓமனை வீழ்த்தியது. அடுத்து கத்தார் அணிக்கு (அக். 14) எதிராக 'டிரா' செய்யும் பட்சத்தில், 1990க்கு பின் உலக கோப்பை பிரதான சுற்றுக்கு யு.ஏ.இ., அணி தகுதி பெறும்.

* டில்லி பாதி மாரத்தான் ஓட்டத்தில் கென்யாவின் அலெக்ஸ் மடாடா (59.50 நிமிடம், ஆண்கள்), லிலியன் கசாய்ட் ரெங்கெருக் (1:07.20, பெண்கள்) சாம்பியன் பட்டம் வென்றனர். இந்தியா சார்பில் அபிஷேக் பால் (1:04.17), சீமா (1:11.23) முதலிடம் பிடித்தனர்.

* அசாமின் கவுகாத்தியில், உலக ஜூனியர் பாட்மின்டன் சாம்பியன்ஷிப் (தனிநபர், இரட்டையர்) இன்று துவங்குகிறது. இந்தியா சார்பில் உன்னதி ஹூடா, தன்வி சர்மா, ரக் ஷிதா ஸ்ரீ உள்ளிட்டோர் பங்கேற்கின்றனர்.

* ஆமதாபாத்தில் நடந்த ஆசிய அக்குவாடிக்ஸ் சாம்பியன்ஷிப், பெண்களுக்கான வாட்டர் போலோ போட்டியில் 8வது இடம் பிடித்த இந்தியா, அடுத்த ஆண்டு நடக்கவுள்ள ஆசிய விளையாட்டுக்கு தகுதி பெற்றது. ஆண்கள், பெண்கள் பிரிவில் சீனா தங்கம் வென்றது.

* ஏதென்சில் நடக்கும் உலக துப்பாக்கி சுடுதல் சாம்பியன்ஷிப், 'ஸ்கீட்' பிரிவில் இந்திய வீராங்கனை ரைசா தில்லான், 16வது இடம் பிடித்தார். ஆண்கள் பிரிவில் இந்தியாவின் பாவ்தேக் சிங் கில், 38வது இடம் பிடித்தார்.