ஸ்டாவஞ்சர்: நார்வேயில் சர்வதேச செஸ் தொடர் நடக்கிறது. ஓபன் பிரிவில், நடப்பு உலக சாம்பியன் இந்தியாவின் குகேஷ், அர்ஜுன் எரிகைசி, ஐந்து முறை உலக சாம்பியன் கார்ல்சன் (நார்வே) உட்பட 6 பேர் பங்கேற்கின்றனர்.

மூன்றாவது சுற்றில் குகேஷ், அமெரிக்காவின் ஹிகாரு நகமுராவை சந்தித்தார். வெள்ளை நிற காய்களுடன் விளையாடினார் குகேஷ். 31வது நகர்த்தலில் நகமுரா தவறு செய்ய, குகேஷ் 42வது நகர்த்தலில் வெற்றி பெற்றார். மற்றொரு போட்டியில் அர்ஜுன், அமெரிக்காவின் பேபியானோ காருணாவிடம் தோல்வியடைந்தார். மூன்று சுற்று முடிவில் காருணா (6.0), கார்ல்சன் (5.0), ஹிகாரு நகமுரா (4.5), அர்ஜுன் (4.5), குகேஷ் (3.0) 'டாப்-5' ஆக உள்ளனர்.

பெண்களுக்கான மூன்றாவது சுற்றில் இந்தியாவின் ஹம்பி, ஸ்பெயினின் சாராவை வென்றார். இந்தியாவின் வைஷாலி, 'டை பிரேக்கரில்' சீனாவின் வென்சுனிடம் வீழ்ந்தார். மூன்று சுற்று முடிவில் உக்ரைனின் அனா முஜிசக் (6.0), ஹம்பி (6.0), சீனாவின் டிங்ஜீ (4.0) 'டாப்-3' இடத்தில் உள்ளனர். வைஷாலி (1.0) 5வது இடத்தில் உள்ளார்.