சமர்கந்த்: கிராண்ட் சுவிஸ் தொடரில் இந்தியாவின் குகேஷ்-திவ்யா மோதிய போட்டி 'டிரா' ஆனது.

உஸ்பெகிஸ்தானில் 'கிராண்ட் சுவிஸ்' செஸ் தொடர் நடக்கிறது. இதில் 'டாப்-2' இடம் பெறும் வீரர், வீராங்கனைகள், 2026ல் நடக்கவுள்ள 'கேண்டிடேட்ஸ்' தொடரில் பங்கேற்க தகுதி பெறலாம்.

நேற்று எட்டாவது சுற்று போட்டி நடந்தன. ஓபன் பிரிவில் உலக சாம்பியன் குகேஷ், உலக கோப்பை வென்ற திவ்யா என இருவரும் மோதினர். இத்தொடரில் தொடர்ந்து மூன்று போட்டியில் தோற்ற குகேஷ், இம்முறை வெள்ளை நிற காய்களுடன் விளையாடினார். 46 நகர்த்தல் வரை இருவரும் சமநிலையில் நீடித்தனர்.

47 வது நகர்த்தலில் குகேஷ் தவறு செய்ய, திவ்யா முந்தினார். இருப்பினும் 103 வது நகர்த்தலில் போட்டி 'டிரா' ஆனது.

இந்தியாவின் பிரக்ஞானந்தா, நிஹால் சரின், அர்ஜுன், பிரனவ் தங்களது 8வது சுற்று போட்டியில் 'டிரா' செய்தனர். 8 சுற்று முடிவில் ஜெர்மனியின் மத்தியாஸ் (6.0), நிஹால் சரின் (6.0) முதல் இரு இடத்தில் உள்ளனர்.

வைஷாலி அதிர்ச்சி: பெண்கள் பிரிவு 8வது சுற்றில் இந்தியாவின் வைஷாலி, கஜகஸ்தானின் பிபிசாரா மோதினர். கருப்பு நிற காய்களுடன் விளையாடிய வைஷாலி, அடுத்தடுத்து தவறுகள் செய்ய, 39 வது நகர்த்தலில் தோல்வியடைந்தார். இத்தொடரில் முதல் தோல்வியடைந்த இவர், 6.0 புள்ளியுடன் இரண்டாவது இடத்துக்கு தள்ளப்பட்டார். ரஷ்யாவின் கேத்தரினா (6.5) முதலிடத்தில் உள்ளார்.