சென்னை கிராண்ட் மாஸ்டர்ஸ் செஸ் தொடரின் இரண்டாவது சீசன் நேற்று, அண்ணா நூற்றாண்டு நூலகத்தில் துவங்கியது. இந்தியா சார்பில் அர்ஜுன் எரிகைசி, விதித் குஜ்ராத்தி, தமிழகத்தின் அரவிந்த் சிதம்பரம், அமெரிக்காவின் லெவான் ஆரோனியன் உட்பட 8 பேர், இதில் பங்கேற்கின்றனர்.

நேற்று, முதல் சுற்று நடந்தது. அர்ஜுன்-விதித் மோதினர். துவக்கத்தில் இருவரும் சமபலத்தில் விளையாடினர். 54 வது நகர்த்தலில் விதித் ஆதிக்கம் செலுத்தினார். இதில் இருந்து சாமர்த்தியமாக மீண்டு வந்த அர்ஜுன், 96 வது நகர்த்தலில் வெற்றி பெற்றார். பிரான்சின் வாசியர், ஈராவின் பர்ஹாமை வீழ்த்தினார். ஆரோனியன்-சரனா, அரவிந்த் சிதம்பரம்-அமின் மோதிய போட்டி 'டிரா' ஆகின.

வைஷாலி ஏமாற்றம்

சாலஞ்சர் பிரிவில் வைஷாலி, ஹரிகா என 2 வீராங்கனை, பிரனவ், பிரனேஷ் உட்பட 6 வீரர்கள் என மொத்தம் 8 இந்திய நட்சத்திரங்கள் மட்டும் பங்கேற்கின்றனர். நேற்று முதல் சுற்று நடந்தன. வைஷாலி, சக வீரர் லியான் மென்டன்காவிடம் தோல்வியடைந்தார். மற்றொரு போட்டியில் பிரனவ், சக வீராங்கனை ஹரிகாவை வென்றார். பிரனேஷ், அபிமன்யுவை சாய்த்தார். கார்த்திகேயன் முரளி, ரவுனக்கை வீழ்த்தினார்.