குமி: ஆசிய தடகள சாம்பியன்ஷிப்பில் இந்திய படை சாதிக்க காத்திருக்கிறது.

தென் கொரியாவின் குமி நகரில், 26வது ஆசிய தடகள சாம்பியன்ஷிப் இன்று துவங்குகிறது. 43 நாடுகளில் இருந்து 2000 வீரர், வீராங்கனைகள் பங்கேற்கின்றனர். கடந்த முறை தாய்லாந்தில் நடந்த போட்டியில் இந்தியா 27 பதக்கத்துடன் (6 தங்கம், 12 வெள்ளி, 9 வெண்கலம்) 3வது இடம் கைப்பற்றியது.

இம்முறை இந்தியா சார்பில் 59 பேர் கொண்ட அணி களமிறங்குகிறது. ஈட்டி எறிதலில் சச்சின் யாதவ், யாஷ்விர் சிங் அசத்தலாம். பெண்களுக்கான ஈட்டி எறிதலில் அன்னு ராணி, 400 மீ., ஓட்டத்தில் வித்யா (தமிழகம்), ரூபல், ஆண்கள் பிரிவில் ஜெய் குமார், விஷால் களமிறங்க உள்ளனர்.

'டிரிபிள் ஜம்ப்' போட்டியில் தமிழகத்தின் பிரவீன் சித்ரவேல், அப்துல்லா அபூபக்கர் பதக்கம் வெல்லலாம். அவினாஷ் சபிள் (3000 மீ., ஸ்டீபிள் சேஸ்), ஜோதி (100 மீ., தடை ஓட்டம்), ஷைலி சிங், ஆன்சி சோஜன் (நீளம் தாண்டுதல்), தமிழரசு, ராகுல் குமார், அபிநயா, தண்டீஸ்வரி (4X100), சந்தோஷ் குமார், சுபா (4X400) உள்ளிட்டோர் திறமை வெளிப்படுத்த உள்ளனர்.

இதில் சிறப்பாக செயல்படுபவர்கள், உலக தடகள சாம்பியன்ஷிப்பிற்கு (டோக்கியோ, செப். 13-21) தகுதி பெறுவர்.

ஆசிய தடகள வரலாற்றில் இந்தியா இதுவரை 94 தங்கம், 120 வெள்ளி, 140 வெண்கலம் என 354 பதக்கம் வென்று, பட்டியலில் 3வது இடத்தில் உள்ளது. சீனா 678 (325+227+126), ஜப்பான் 609 (172+206+231) பதக்கத்துடன் முதல் இரு இடத்தில் உள்ளன.

ஒலிம்பிக் ஈட்டி எறிதலில் இரு பதக்கம் (2021ல் தங்கம், 2024ல் வெள்ளி) வென்றவர் இந்தியாவின் நீரஜ் சோப்ரா. கடந்த 2017ல் இந்தியாவில் நடந்த ஆசிய சாம்பியன்ஷிப்பில் தங்கம் வென்றார். செப்டம்பர் மாதம் நடக்கவுள்ள டைமண்ட் லீக், உலக சாம்பியன்ஷிப்பில் கவனம் செலுத்த உள்ளதால், ஆசிய சாம்பியன்ஷிப்பில் பங்கேற்கவில்லை.