உடலுக்கு வலிமை சேர்க்கும் சமநிலை ஆசனங்களின் அடுத்த நிலைகளான நடராஜ ஆசனம், ரதாசர்ய ஆசனம் மற்றும் ஏகபாத ஆசனங்களின் செயல்முறைகளை இந்த வாரம் பார்ப்போம்.

நடராஜ ஆசனம்:

சமஸ்திதி ஆசனம் நிலையில் நின்று, மூச்சை உள்ளிழுத்து, இடது கையை தலைக்கு மேல் துாக்கி, உள்ளங்கை முனனோக்கி இருக்குமாறு வைக்கவும். மூச்சை வெளியிட்டு வலது கால் முட்டியை பின்புறமாக மடித்து, வலது கணுக்காலையோ அல்லது வலது காலையோ வலது கையால் பிடிக்கவும். அடுத்த உள்மூச்சில் வலது காலை பின்புறம் முடிந்த அளவு மேலே துாக்கி, சிறிது அளவு வளைத்து, காலுக்கும் முதுகிற்கும் இடையே ஒரு வில் போன்ற வடிவில் இருக்க வேண்டும். இந்த நிலையில் 10 எண்ணும் வரை இருந்து, மூச்சை உள்ளிழுத்து நேர் நிலைக்கு வரவும். மூச்சை வெளியிட்டு காலை தரையில் வைத்து, கையை பக்கவாட்டில் கொண்டு வரவும். சமஸ்திதி நிலைக்கு திரும்பவும். சிறிது ஓய்வெடுத்து மறுபக்கம் இந்நிலையை செய்யவும். இவ்வாறு நடராஜ ஆசனத்தை மேலும் இருமுறை இடது மற்றும் வலது பக்கங்களில் செய்யவும்.

ரதாசர்ய ஆசனம்:

சமஸ்திதி நிலையில் இருந்து மூச்சை உள்ளிழுத்தபடி, இடது கையை தலை மேலே துாக்கவும். உள்ளங்கை வெளி நோக்கியபடி இருக்க வேண்டும். மூச்சை வெளியிட்டபடி வலது கால் முட்டியை மடித்து, வலது காலை வலது கையினால் பிடிக்கவும். மூச்சை உள்ளிழுத்து வலது காலை உடலின் முன்னால் நேரே நீட்டி, கால் விரல்களைப் பிடிக்கவும். இரண்டு கால்களும் முட்டி மடியாமல் நீண்டு இருக்க வேண்டும். மெதுவாக 10 எண்ணும் வரை அந்த நிலையில் இருந்து, மூச்சை வெளியிட்டபடி கால் முட்டியை மடித்து காலை தரையில் வைத்து, கையை பக்கவாட்டில் கொண்டு வந்து சமஸ்திதி நிலைக்கு வரவும். சிறிது நேரம் ஆழ்ந்து சுவாசித்து, இடது பக்கம் இந்த ஆசனத்தை செய்தபின் மேலும் இருமுறை வடது மற்றும் இடது பக்கங்களில் செய்யவும்.

ஏகபாத ஆசனம்:

சமஸ்திதி ஆசனத்தில் இருந்து மூச்சை உள்ளிழுத்து, இரு கைகளையும் மார்பிற்கு முன்னே நமஸ்கரிப்பது (உள்ளங்கைகள் சேர்ந்த நிலையில்) போல் வைக்கவும். அதே உள்மூச்சில் முன்னே குனிந்து கைகளை முன்னால் நீட்டி, வலது காலை துாக்கவும். கால், உடல், கைகள் ஒரே நேர் கோட்டில் இருக்க வேண்டும். மெதுவாக 10 எண்ணும் வரை அதே நிலையில் இருந்து மூச்சை வெளியிட்டபடி பின் உடலை நேரே நிமிர்த்தி கைகளை நமஸ்கரிக்கும் நிலைக்கு கொண்டு வரவும். சிறிது நேரம் சமஸ்திதி நிலைக்கு வந்து சற்று ஓய்வெடுத்த பின், அடுத்த பக்கம் ஆசனத்தை செய்யவும். மேலும், இருமுறை இடது மற்றும் வலது பக்கங்களில் செய்ய வேண்டும்.

பிற நிலை ஆசனங்கள் அடுத்த வாரம்...