புதுச்சேரி, : புதுச்சேரி மாவட்ட ஆண்களுக்கு இடையிலான, டி-20 கிரிக்கெட் போட்டியில், ஏனாம் அணியை வீழ்த்தி புதுச்சேரி தெற்கு அணி வெற்றி பெற்றது.

கிரிக்கெட் அஸோசியேஷன் ஆப் பாண்டிச்சேரி மற்றும் டி.சி.எம்., நிறுவனம் இணைந்து நடத்தும், புதுச்சேரி மாவட்டங்களுக்கு இடையிலான ஆண்கள் டி-20 கிரிக்கெட் போட்டி கடந்த, 2ம் தேதி துவங்கியது.

இதில், புதுச்சேரி வடக்கு, புதுச்சேரி தெற்கு, புதுச்சேரி மேற்கு, காரைக்கால், மாகி மற்றும் ஏனாம் என ஆறு அணிகள் பங்கேற்று வருகின்றனர். இதில், நேற்று முன்தினம் இரவு 7:00 மணிக்கு நடந்த போட்டியில், மாகி மற்றும் புதுச்சேரி மேற்கு அணிகள் மோதின. இதில் முதலில் ஆடிய மாகி அணி, 20 ஓவர்களில், 5 விக்கெட்டுகளை இழந்து, 138 ரன்கள் எடுத்தது.

அந்த அணியை சேர்ந்த விஜீஷ் 40 பந்துகளில் 43 ரன்கள் குவித்தார். அடுத்ததாக களம் இறங்கிய, புதுச்சேரி மேற்கு அணி, 20 ஓவர்களில் 7 விக்கெட்டுகளை இழந்து, 137 ரன்கள் மட்டும் எடுத்து, 1 ரன் வித்தியாசத்தில் தோல்வியை தழுவியது. அந்த அணியின் மணிகண்டன் 33 பந்துகளில் 42 ரன்கள் எடுத்தார். இந்த போட்டியில், மாகி அணியை சேர்ந்த, சஜூ ஆட்ட நாயகன் விருதை கைப்பற்றினார்.

இதையடுத்து நேற்று மதியம் 3:00 மணிக்கு நடந்த போட்டியில், ஏனாம் மற்றும் புதுச்சேரி தெற்கு அணிகள் மோதின. இந்த போட்டியில் டாஸ் வென்ற ஏனாம் அணி, பேட்டிங்கை தேர்வு செய்தது. முதலில் களம் இறங்கிய ஏனாம் அணி, 20 ஓவர்கள் முடிவில், 4 விக்கெட்டுகளை இழந்து, 164 ரன்களை பெற்றது. அடுத்து ஆடிய, புதுச்சேரி தெற்கு அணி, 19.1 ஓவர்களிலேயே, 6 விக்கெட்டுகளை இழந்து, 166 ரன்களை குவித்து, 4 விக்கெட்டுகள் வித்தியாசத்தில் அதிரடி வெற்றியை பதிவு செய்தது.

இதில் சிறப்பான ஆட்ட திறமையை வெளிப்படுத்தி, புதுச்சேரி தெற்கு அணியின் கார்த்திக் ராஜா ஆட்ட நாயகன் விருதை தட்டி சென்றார்.