கடந்த 2008ம் ஆண்டு புதுச்சேரி அரசு ஊசுட்டேரியை பறவைகள் சரணாலயமாக அறிவித்தது. பறவைகள் சரணாலயத்தில் படகு போக்குவரத்து துவங்க ஏராளமான கட்டுப்பாடுகள் உள்ளது. ஆனால், சுற்றுலா வளர்ச்சி என்ற பெயரில் பறவைகள் சரணாலயமான ஊசுட்டேரயில், தனியார் நிறுவனம் படகு சவாரி செய்ய அனுமதி வழங்கப்பட்டுள்ளது.

வனத்துறையிடம் விசாரித்தபோது, நாங்கள் ஏதும் அனுமதி கொடுக்கவில்லை, சுற்றுலாத்துறை அனுமதி கொடுத்ததாக தெரிவிக்கின்றனர்.

வனத்துறையின் கீழ் உள்ள ஊசுட்டேரியில் படகு குழாம் அமைக்க வனத்துறையிடம் அனுமதி பெறுவது கட்டாயம். ஆனால் அதை மீறி சுற்றுலாத்துறை அனுமதி பெற்று படகு குழாம் இயக்கி வருவது பெரும் சர்ச்சையை உருவாக்கி உள்ளது. ஏற்கனவே இயங்கி வந்த அரசின் படகு குழாம் படகுகள் அனைத்தும் உடைந்து படகு போக்குவரத்து நிறுத்தி விட்டனர். தற்போது, தனியார் நிறுவனத்தின் படகு குழாம் மட்டுமே இயங்கி வருகிறது.

ஊசுட்டேரியில் படகு குழாம் அமைக்க சாதாரண பொதுமக்கள் விண்ணப்பித்தால், சுற்றுலாத்துறை அனுமதி கொடுக்குமா என பொதுமக்கள் கேள்வி எழுப்பி உள்ளனர். இதுபோல் ஆளாளுக்கு ஊசுட்டேரியில் படகு குழாம் அமைத்து படகு சவாரி நடத்தினால், பறவைகள் சரணாலயம் என்பதற்கான கட்டமைப்பு சிதையும் அபாயம் உள்ளது.