அடுத்தது என்ன?: ஆலோசித்த பழனிசாமி

தி.மு.க.,வில் மா.செ.,க்கள் மற்றும் அமைச்சர்களை தேர்தல் பணிக்கு விரட்டி பணியாற்ற வைத்தது போல, அ.தி.மு.க.,விலும் மாவட்ட மற்றும் மாநில நிர்வாகிகளை தேர்தலுக்கு முன் ஒவ்வொரு நாளும் தொடர்பு கொண்டு விரட்டினார், அக்கட்சியின் பொதுச்செயலர் பழனிசாமி.
ஒவ்வொரு தொகுதியிலும் குறைந்தபட்சம் 25 சதவீத ஓட்டுகளை பெற வேண்டும்; இல்லையேல் பதவியை பறிக்கத் தயங்க மாட்டேன் என கூறி, நிர்வாகிகளை அதிர வைத்தார் பழனிசாமி. இதனால், துவக்கத்தில் தேர்தல் பணியில் இருந்த அ.தி.மு.க., - மா.செ.,க்களும், மாவட்ட, மாநில நிர்வாகிகளும் களம் இறங்கி வேகமாக பணியாற்றினர்.
ஆனால், தேர்தல் கருத்துக்கணிப்புகள் அந்தளவுக்கு அ.தி.மு.க.,வுக்கு சாதகமாக இல்லாததால், கட்சியினர் மீது பழனிசாமி கடும் அதிருப்தியில் உள்ளார். பெரிய அளவில் வெற்றி கிடைக்காத சூழலில், அடுத்தடுத்து எப்படி செயல்படுவது என்பது குறித்து, நேற்று கட்சியின் இரண்டாம் கட்டத் தலைவர்கள் சிலரோடு பழனிசாமி ஆலோசித்ததாக கட்சி வட்டாரங்கள் கூறின.