மதுரை: மதுரை உட்பட தென் மாவட்ட அரசு மருத்துவமனைகளில், டீன்களை நியமிக்க தாக்கலான வழக்கில், தமிழக அரசுக்கு நோட்டீஸ் அனுப்ப, உயர் நீதிமன்ற மதுரை கிளை உத்தரவிட்டது.

மதுரை வெரோணிக்கா மேரி தாக்கல் செய்த பொதுநல மனு: மதுரை, ராமநாதபுரம், விருதுநகர், கன்னியாகுமரி, திருச்சி, புதுக்கோட்டை, கரூர் அரசு மருத்துவமனைகளில் டீன் பணியிடங்கள் காலியாக உள்ளன. மூத்த பேராசிரியர்கள் டீன் பணியை கூடுதல் பொறுப்பாக கவனிக்கின்றனர்.

ஒரு துறையில் தலைவராக பணிபுரியும் மருத்துவ பேராசிரியர்கள் அனுபவம் குறைவால் பொறுப்பு டீனாக இருக்கும் போது, நோயாளிகள், நிர்வாகம் சார்ந்த முடிவுகள் எடுப்பதில் தாமதம் ஏற்படும். இதனால் சிகிச்சையில் பாதிப்பு ஏற்படும்.

அனுபவம், தகுதி, திறமையானவர்களை முழுநேர பணியில் டீன்களாக நியமிக்கக் கோரி, தமிழக சுகாதாரத்துறை செயலருக்கு மனு அனுப்பினேன். நடவடிக்கை எடுக்க உத்தரவிட வேண்டும்.
நீதிபதிகள் ஆர்.சுப்பிரமணியன், எல்.விக்டோரியா கவுரி அமர்வு: தமிழக சுகாதாரத்துறை செயலர், மருத்துவக் கல்வி இயக்குனருக்கு நோட்டீஸ் அனுப்ப உத்தரவிட்டு செப்., 3க்கு ஒத்திவைத்தது.