முக்கிய சாலைகளில் போக்குவரத்து பாதிப்பு பலத்த மழை மற்றும் யமுனை நதியின் வெள்ளப்பெருக்கு காரணமாக, டில்லியில் நேற்று காலையில், அலுவலகங்களுக்கு சென்றோர் கடும் அவதிக்கு ஆளாகினர். பல இடங்களில் போக்குவரத்து ஆமை வேகத்தில் இயங்கியது. சாலையில் தேங்கி நின்ற தண்ணீரால், ஏராளமான வாகனங்கள் வரிசை கட்டி நின்றன. குறிப்பாக, காஷ்மீர் கேட், ரிங் ரோடு, அவுட்டர் ரிங் ரோடு மற்றும் கலிந்தி குஞ்ச் பகுதிகளில் கடும் போக்குவரத்து நெரிசல் ஏற்பட்டது. வாகன போக்குவரத்து பாதிக்கப்பட்டது குறித்து போலீசார் கூறும் போது, 'யமுனை நதிக்கரையோரங்களில் தான், போக்குவரத்து பாதிக்கப்பட்டது. அந்த பகுதிகளை தவிர்க்குமாறு, கேட்டுக் கொண்டோம்' என்றனர். சமூக வலைதளங்கள் வாயிலாக அவர்கள், இத்தகைய அழைப்பை செய்திருந்தனர். குறிப்பாக, சாந்த் கிராம் அகாராவிலிருந்து ராஜ்காட் செல்லும் வழிகளில், வழக்கமான வழிகளில் செல்லாமல், மாற்று வழிகளை பயன்படுத்துமாறு வாகன ஓட்டிகளை, போலீசார் கேட்டுக் கொண்டனர். அதுபோல, டில்லி மெட்ரோ ரயில்களை பயன்படுத்துமாறும், வாகன ஓட்டிகளை போலீசார் கேட்டுக் கொண்டனர். வழக்கமாக சில நிமிடங்களில் கடக்கக் கூடிய வழிகளை நேற்று கடக்க, பல மணி நேரம் பிடித்தது என வாகன ஓட்டிகள் கவலை தெரிவித்தனர். நேற்று காலையில் சிலர், ஆங்காங்கே கார்களை நிறுத்தி விட்டு, மெட்ரோ ரயில்களை பிடித்து, அலுவலகம் சென்றனர். யமுனை நதியின் கரையோரங்களில் உடைப்பு ஏற்பட்ட இடங்களில் மாநில பொதுப்பணித்துறையினர், மண்ணை கொட்டி, சீரமைத்தனர்.

மீட்பு பணியில் மீட்பு படையினர் டில்லியில் ஓடும் யமுனை நதியால் பெரும் பாதிப்பை சந்தித்துள்ள டில்லி மக்களை, தேசிய பேரிடர் மீட்பு படையினர் காப்பாற்றியுள்ளனர். பல இடங்களில், நிவாரண முகாம்களை வெள்ள நீர் சூழ்ந்துள்ளது. குறிப்பாக, யமுனா பஜார் மற்றும் மயூர் விஹார் பேஸ் 1 ஆகிய இடங்களில் வசிப்பவர்கள் நீர் தேங்கியதால், பாதிப்படைந்தனர். அவர்களை தங்க வைக்கும் நிவாரண முகாம்களையும் வெள்ள நீர் சூழ்ந்ததால், அவதி அடைந்தனர். மேலும், வெள்ள நீரால் அவதிப்படுபவர்களை தேசிய பேரிடர் மீட்புப்படையினர் மீட்டனர். அவர்கள் உயரமான டிராக்டர்கள் வாயிலாக, பாதுகாப்பான இடங்களுக்கு மாற்றப்பட்டனர். அதுபோல, டில்லியின் பல பகுதிகளில் தேசிய பேரிடர் மீட்புப்படையினர், மீட்பு மற்றும் நிவாரண பணிகளில் வாகனங்களுடன் ஈடுபட்டனர்.

மழை நீரில் நனைந்த புத்தகங்கள் தொடர்ந்து பெய்யும் மழை மற்றும் யமுனை நதியில் ஏற்பட்டுள்ள வெள்ளப் பெருக்கால், தங்கள் வீடுகளில் வைத்திருந்த பள்ளி மாணவியரின் புத்தகங்கள் மற்றும் சீருடைகள் நனைந்து விட்டன. அவற்றை காய வைத்துள்ள மாணவியர், 'எங்களுக்கு யார் மீண்டும் புத்தகங்களை தருவர்' என கேள்வி எழுப்பினர். நேற்று மதியம், 2 மணி நிலவரப்படி, யமுனை நதியில் 207.445 மீட்டர் அளவுக்கு வெள்ள நீர் பாய்ந்தது. இதனால், கரையோரங்களில் வசித்தவர்கள், கட்டாயமாக வெளியேற்றப்படுகின்றனர். இதற்கிடையே, தொடர்ந்து மழை பெய்து வருவதாலும், யமுனை நதியின் வெள்ளப் பெருக்காலும், பல வீடுகளில் பள்ளிக்குழந்தைகளின் பள்ளி புத்தகங்கள் நனைந்து விட்டன. அவற்றை பாதுகாக்க, மாணவியர் பெரும்பாடு பட்டனர்.