பாக்.,கிற்கு கடன் வழங்கிய சர்வதேச நிதியம் புதிய நிபந்தனைகள்!:
பாக்.,கிற்கு கடன் வழங்கிய சர்வதேச நிதியம் புதிய நிபந்தனைகள்!:
பாக்.,கிற்கு கடன் வழங்கிய சர்வதேச நிதியம் புதிய நிபந்தனைகள்!:
UPDATED : மே 19, 2025 04:21 AM
ADDED : மே 19, 2025 12:07 AM
இஸ்லாமாபாத்: பாகிஸ்தானுக்கு கடன் உதவியை வழங்கியுள்ள, ஐ.எம்.எப்., எனப்படும் சர்வதேச நாணய நிதியம் புதிதாக, 11 நிபந்தனைகளை விதித்துள்ளது. மேலும், இந்தியாவுடனான பதற்றம் நீடித்தால், மிகப்பெரிய சிக்கலை சந்திக்க நேரிடும் என்றும் எச்சரித்துள்ளது.
நம் அண்டை நாடான பாகிஸ்தான், கடும் நிதி நெருக்கடியில் உள்ளது. இதற்காக, சர்வதேச நாணய நிதியத்திடம் இருந்து கடன் வாங்கி வருகிறது.
சமீபத்தில், பயங்கரவாதிகளுக்கு எதிராக இந்தியா, 'ஆப்பரேஷன் சிந்துார்' என்ற நடவடிக்கையை எடுத்தது. இதில் பாகிஸ்தானுக்கு கடும் சேதம் ஏற்பட்டது.
இந்த சூழ்நிலையில், பாகிஸ்தானுக்கான கடனில் இரண்டாம் கட்டமாக, 8,670 கோடி ரூபாயை, சர்வதேச நாணய நிதியம் சமீபத்தில் விடுவித்தது.
ஒப்புதல்
அடுத்தகட்ட நிதியை விடுவிப்பதற்காக, பாகிஸ்தானுக்கு, சர்வதேச நிதியம் புதிதாக, 11 நிபந்தனைகளை விதித்துள்ளது. இதன் வாயிலாக, நிபந்தனைகளின் எண்ணிக்கை, 50 ஆக உயர்ந்துள்ளது.
அடுத்த தவணையை விடுவிப்பதற்கு முன்பாக, இந்த புதிய நிபந்தனைகளை அமல்படுத்த வேண்டும் என்று சர்வதேச நாணய நிதியம் கூறி உள்ளது.
இதில் பெரும்பாலான நிபந்தனைகளை வரும் ஜூன் மாதத்துக்குள் நிறைவேற்ற வேண்டும் என, சர்வதேச நாணய நிதியம் கூறியுள்ளது.
'இந்தியாவுடன் தேவையில்லாமல் பதற்றத்தை அதிகரிக்கும் சம்பவங்களில் ஈடுபட்டால், அது பாகிஸ்தானின் நிதி மற்றும் சீர்திருத்த இலக்குகளுக்கு ஆபத்தை அதிகரிக்கக்கூடும்' என, இந்த நிபந்தனைகளுடன், சர்வதேச நாணய நிதியம் எச்சரிக்கையும் விடுத்துஉள்ளது. தற்போது விதிக்கப்பட்டுள்ள புதிய நிபந்தனைகளில் மிக முக்கியமாக, கூடுதலாக, 534 கோடி ரூபாய் மதிப்புள்ள வரி சீர்திருத்த பட்ஜெட்டுக்கு, பார்லிமென்டில் ஜூன் மாதத்துக்குள் ஒப்புதல் பெற வேண்டும்.
குறிப்பாக, மின்சார கட்டண சலுகைகளில் ஏற்பட்ட பெரும் இழப்பை ஈடு செய்யும் வகையில், கட்டணத்தை சீரமைக்க வேண்டும், வரியை உயர்த்த வேண்டும் என்று கூறப்பட்டுள்ளது.
மானியம் ரத்து
இதனால், மின்சார கட்டணத்தை கடுமையாக உயர்த்த வேண்டிய நிலைக்கு பாக்., அரசு தள்ளப்பட்டுள்ளது.
அதுபோலவே, சமையல் காஸ் விலையையும் ஆண்டுக்கு குறைந்தபட்சம், இரண்டு முறை உயர்த்த வேண்டும்.
இதிலும் சலுகைகள், மானியங்களை ரத்து செய்ய, சர்வதேச நிதியம் உத்தரவிட்டுள்ளது.
அடுத்ததாக, விவசாயத்துக்கான வருமான வரியை நிர்ணயிப்பதில் சீர்திருத்த நடவடிக்கைகள் எடுக்கவும், பாகிஸ்தானுக்கு, சர்வதேச நிதியம் நிபந்தனை விதித்துள்ளது.
தங்களுடைய பரிந்துரைகளின் அடிப்படையில், 2027ல் இருந்து மேற்கொள்ள உள்ள சீர்திருத்த நடவடிக்கைகள் தொடர்பாக விரிவான திட்டங்களை தெரியப்படுத்த வேண்டும் என்ற நிபந்தனையும் விதிக்கப்பட்டுள்ளது.
ராணுவத்துக்கான பட்ஜெட்டை அதிகரித்துள்ளது குறித்தும் சர்வதேச நாணய நிதியம் தன் கவலையை தெரிவித்துள்ளது.