கொரோனா பெருந்தொற்று பரவத் துவங்கிய, கடந்த 2020 மார்ச்சில் பி.எம்., கேர்ஸ் நிதி உருவாக்கப்பட்டது. இந்த நிதிக்கு தரப்படும் நன்கொடை தொகை மற்றும் இருப்பு ஆகியவற்றின் அறிக்கை, ஆண்டுதோறும் அதன் இணையதளத்தில் பதிவேற்றப்படும்.

அந்த வகையில், 2022 - 23 நிதியாண்டுக்கான தகவல்கள் இணையதளத்தில் உள்ளன. அதன்படி, 2022 - 23ல் பி.எம்., கேர்ஸில் உள்ள மொத்த இருப்பு 6,283 கோடி ரூபாய். இந்த ஆண்டில் 912 கோடி ரூபாய் நன்கொடை சேர்ந்துள்ளது. கொரோனாவால் தாய், தந்தையரை இழந்த குழந்தைகளுக்காக, 346 கோடி ரூபாய் செலவிடப்பட்டுள்ளது.

பி.எம்., கேர்ஸ் நிதி துவங்கப்பட்ட 2020 -- 21 நிதியாண்டில் மிக அதிகபட்சமாக 7,184 கோடி ரூபாயும், 2021 - 22ல் 1,938 கோடி ரூபாயும் நன்கொடை குவிந்தது. தற்போது அது 912 கோடி ரூபாயாக சுருங்கியுள்ளது.

இந்த நன்கொடையில், வெளிநாட்டில் இருந்து பங்களிப்பு வழங்குவோரும் உள்ளனர். அந்த தொகையும், 2020 --- 21ல் 495 கோடி ரூபாயாக இருந்தது; தற்போது 2.57 கோடி ரூபாயாக சரிந்துள்ளது.