5,000 பக்தர்கள் மீட்பு

உத்தரகண்டிலும் பலத்த மழை பெய்து வருகிறது. கேதார்நாத்திற்கு புனித யாத்திரை மேற்கொண்ட பக்தர்கள் 5,000 பேர், பிம்பாலி சவுக்கி என்ற பகுதியில் ஏற்பட்ட நிலச்சரிவில் சிக்கித் தவித்தனர். அவர்கள் சென்ற பாதையில் கனமழை காரணமாக திடீர் நிலச்சரிவு ஏற்பட்டு, சாலை துண்டிக்கப்பட்டது. தகவலறிந்து வந்த மீட்புக் குழுவினருடன் இந்திய விமானப் படையின் 'சினுாக், எம்.ஐ., 17' ரக ஹெலிகாப்டர்கள் உதவியுடன் பத்திரமாக மீட்கப்பட்டனர்.பாதுகாப்பான இடங்களுக்கு அழைத்து வரப்பட்ட அவர்களுக்கு, தங்குமிடமும், உணவுப் பொட்டலங்களும் வழங்கப்பட்டன. கேதார்நாத் செல்லும் வழியில் பாதைகள் சேதமடைந்துள்ளதால், பக்தர்கள் தங்கள் பயணத்தை ஒத்திவைக்குமாறு உத்தரகண்ட் அரசு வலியுறுத்தியுள்ளது. சார்தாம் யாத்திரை செல்லும் பயணியரின் பதிவும் தற்காலிகமாக நிறுத்தி வைக்கப்பட்டுள்ளது. இதுவரை, உத்தரகண்ட் மாநிலத்தில் கனமழைக்கு 14 பேர் உயிரிழந்துள்ளனர்; 10 பேர் காயமடைந்துள்ளதாக மாநில அரசு தரப்பில் தெரிவிக்கப்பட்டுள்ளது.