தன் ரசிகர் கொலை வழக்கில், அன்னபூர்ணேஸ்வரி போலீஸ் நிலையத்தில் உள்ள நடிகர் தர்ஷன், தன் தவறை உணர்ந்துள்ளதாக கூறப்படுகிறது. மேலும், ஒரு உயர் போலீஸ் அதிகாரியின் காலில் விழுந்து, 'என்னை விட்டு விடுங்கள்' என்று கெஞ்சினாராம். ஆரம்பத்தில் சரியாக பதில் அளிக்காமல் இருந்த அவரது பேச்சில், நேற்று திடீரென வித்தியாசம் தெரிந்துள்ளது.

கொலை செய்த பின், சாட்சியங்களை அழிக்கும் வகையில், ஏ 14வது குற்றவாளி பிரதோஷ், ரேணுகாசாமியின் மொபைல் போனை, அருகில் இருந்த சாக்காடை கால்வாயில் வீசினார். நேற்று அந்த கால்வாய் பகுதிக்கு பிரதோஷை அழைத்து சென்று விசாரித்து உள்ளனர். ஊழியர்களும், கால்வாயில் இறங்கி, மொபைல் போனை தேடும் பணியில் ஈடுபட்டனர். காலை முதல், மாலை வரை தேடியும் கிடைக்கவில்லை.ரேணுகாசாமியை கொலை செய்த போது, தர்ஷன் கூட்டாளிகள் லட்சுமண், நாகராஜ் ஆகியோரது ஆடைகள் மீது ரத்த கறை படிந்துள்ளது. இதையடுத்து, பழைய ஆடைகளை கழற்றி விட்டு, ஆர்.ஆர்.நகரில், 'டிரெண்ட்ஸ்' என்ற துணிக்கடையில், புதிய ஆடைகள் வாங்கி, அணிந்து கொண்டுள்ளனர். பின், அருகில் இருந்த விநாயகர் கோவிலுக்கு சென்று சாமி தரிசனம் செய்துள்ளனர். அந்த இடங்களுக்கு இருவரையும், போலீசார் நேற்று அழைத்து சென்று விசாரித்தனர்.