முறைகேடு புகார்: எம்.பி., உறவினர் மீது வழக்கு

மஹாராஷ்டிராவின் வடமேற்கு மும்பை லோக்சபா தொகுதியில், சிவசேனாவின் ரவீந்திர வைகர், 48 ஓட்டுகள் வித்தியாசத்தில், சிவசேனா - உத்தவ் தாக்கரே பிரிவின் கஜானன் கீர்த்திகரை வென்றார். ஓட்டு எண்ணிக்கையின்போது, இவருடைய உறவினர் மோசடியில் ஈடுபட்டதாக குற்றஞ்சாட்டப்பட்டுள்ளது. அவர் மீது போலீசார் வழக்குப் பதிவு செய்துள்ளனர்.ஓட்டு எண்ணிக்கையின்போது, மின்னணு ஓட்டுப் பதிவு இயந்திரங்களை திறப்பதற்கு, தேர்தல் எண்ணும் அதிகாரிகளுக்கு, ஓ.டி.பி., எனப்படும் ஒருமுறை பயன்படுத்தும் ரகசிய எண் அனுப்பி வைக்கப்படும். ஆனால், குறிப்பிட்ட ஓட்டு எண்ணும் மையத்தில் பணியாற்றிய தினேஷ் கவுரவின் மொபைல்போன், ரவீந்திர வைகரின் உறவினரிடம் இருந்ததாகக் கூறப்படுகிறது.இதையடுத்து, அந்த அதிகாரி, எம்.பி.,யின் உறவினர் உள்ளிட்டோர் மீது போலீசார் வழக்குப் பதிவு செய்து விசாரித்து வருகின்றனர். இந்நிலையில், அந்த அதிகாரியின் மொபைல்போனில் இருந்து அழைப்புகள் செய்யப்பட்டதா, பெறப்பட்டதா என்பது தொடர்பாகவும் விசாரணை நடந்து வருகிறது.மேலும், ஓட்டு எண்ணிக்கையில் ஏதேனும் குளறுபடி செய்யப்பட்டதா என்பது தொடர்பாகவும் விசாரணை நடந்து வருகிறது. மும்பை வடமேற்கு லோக்சபா தொகுதி தேர்தல் அதிகாரி வந்தனா சூர்யவன்ஷி நேற்று கூறுகையில், ''மின்னனு ஓட்டுப்பதிவு இயந்திரத்தை திறக்க ஒடிபி தேவையில்லை. இது தொடர்பாக வரும் செய்தி தவறானது,'' என்றார்.