சில்லரை விலை பணவீக்கம் 6 ஆண்டுகளில் இல்லாத சரிவு ரிசர்வ் வங்கி வட்டியை குறைக்க வாய்ப்பு
சில்லரை விலை பணவீக்கம் 6 ஆண்டுகளில் இல்லாத சரிவு ரிசர்வ் வங்கி வட்டியை குறைக்க வாய்ப்பு
சில்லரை விலை பணவீக்கம் 6 ஆண்டுகளில் இல்லாத சரிவு ரிசர்வ் வங்கி வட்டியை குறைக்க வாய்ப்பு
ADDED : மே 13, 2025 11:45 PM
புதுடில்லி:கடந்த ஏப்ரல் மாதத்தில், சில்லரை விலை பணவீக்கம் 3.16 சதவீதமாக குறைந்துள்ளது. இது கிட்டத்தட்ட ஆறு ஆண்டு காலத்தில் இல்லாத அளவுக்கு குறைவாகும். கடந்த 2019 ஜூலை மாதத்தில் பதிவான 3.15 சதவீத பணவீக்கத்துக்கு பின், இதுவே மிகவும் குறைந்த அளவாகும்.
காய்கறிகள், பழங்கள், பருப்பு வகைகள் உள்ளிட்டவற்றின் விலை குறைந்ததே, பணவீக்கம் குறைய முக்கிய காரணமாக அமைந்தது.
சில்லரை விலை பணவீக்கம், கடந்த மார்ச் மாதம் 3.34 சதவீதமாகவும்; கடந்தாண்டு ஏப்ரலில் 4.83 சதவீதமாகவும் இருந்தது குறிப்பிடத்தக்கது. கடந்த மாதம் உணவுப் பிரிவு பணவீக்கம் 1.78 சதவீதமாக குறைந்திருந்தது.
இதுவே கடந்த 2021 அக்டோபர் மாதத்துக்கு பின் மிகவும் குறைவாகும். முந்தைய மார்ச் மாதத்தில் உணவு பிரிவு பணவீக்கம் 2.69 சதவீதமாக இருந்தது. இதனிடையே கடந்த மாதம், நகர்ப்புறங்களில் பணவீக்கம் 3.36 சதவீதமாகவும்; கிராமப்புறங்களில் 2.92 சதவீதமாகவும் இருந்தது.
தொடர்ந்து மூன்றாவது மாதமாக பணவீக்கம், ரிசர்வ் வங்கியின் இலக்குக்குள் வந்துள்ளதையடுத்து, அடுத்த மாதம் நடைபெறவுள்ள ரிசர்வ் வங்கியின் பணக் கொள்கை குழு கூட்டத்தில் வங்கிக் கடன் வட்டியான ரெப்போ விகிதம் மேலும் குறைக்கப்படும் என்ற எதிர்பார்ப்பு அதிகரித்துள்ளது.
பணவீக்கம் தொடர்ந்து குறைந்து வந்ததால், ஏற்கனவே கடந்த இரண்டு கூட்டங்களில் வட்டி விகிதத்தை தலா 0.25 சதவீதம் குறைத்தது குறிப்பிடத்தக்கது. நடப்பு நிதியாண்டில் சில்லரை விலை பணவீக்க விகிதம், சராசரியாக 4 சதவீதமாக இருக்கும் என ரிசர்வ் வங்கி கணித்துள்ளது.