புதுடில்லி: நாட்டின் தொழில்துறை உற்பத்தி வளர்ச்சி, கடந்த மே மாதத்தில் 1.20 சதவீதமாக குறைந்து, ஒன்பது மாதங்களில் இல்லாத சரிவைக் கண்டுள்ளதாக, மத்திய புள்ளியியல் அமைச்சகத்தின் தரவுகளில் தெரிவிக்கப்பட்டுள்ளது. கடந்தாண்டு மே மாதத்தில் தொழில் துறை உற்பத்தி வளர்ச்சி 6.30 சதவீதமாக இருந்தது.

இதற்கிடையே, கடந்த ஏப்ரல் மாதத்துக்கான வளர்ச்சி 2.70 சதவீதத்திலிருந்து 2.60 சதவீதமாக திருத்தப்பட்டுள்ளது. தயாரிப்பு, சுரங்கம், மின்சாரம் என அனைத்து துறைகளின் வளர்ச்சியுமே, கடந்த மே மாதத்தில் கணிசமாக குறைந்துள்ளது.

தயாரிப்பு துறையை மட்டும் பொறுத்தவரை, வளர்ச்சி, கடந்தாண்டு மே மாதம் 5.10 சதவீதமாக இருந்த நிலையில், நடப்பாண்டு மே மாதம் 2.60 சதவீதமாக குறைந்துள்ளது. சுரங்கத் துறை வளர்ச்சி 0.10 சதவீதமும்; மின்சாரத் துறை வளர்ச்சி 5.50 சதவீதமும் சரிந்துள்ளது. கடந்தாண்டு மே மாதம், இவை இரண்டும் முறையே 6.60 சதவீதமும்; 13.70 சதவீதமும் வளர்ச்சி கண்டிருந்தன.