புதுடில்லி : முக்கிய எட்டு உள்கட்டமைப்பு துறைகளின் வளர்ச்சி, 13 மாதங்களில் இல்லாத அளவுக்கு கடந்த ஆகஸ்ட் மாதத்தில் 6.30 சதவீதமாக அதிகரித்துள்ளதாக, மத்திய வர்த்தக அமைச்சக தரவுகளில் தெரிவிக்கப்பட்டுள்ளது.

கடந்தாண்டு ஆகஸ்ட் மாதத்தில் மைனஸ் 1.50 சதவீதமாகவும்; கடந்த ஜூலை மாதத்தில் 3.70 சதவீதமாகவும் வளர்ச்சி இருந்தது.

எட்டு முக்கிய துறைகளில், நிலக்கரி, கச்சா எண்ணெய், இயற்கை எரிவாயு, பெட்ரோலிய சுத்திகரிப்பு பொருட்கள், உரம், உருக்கு, சிமென்ட், மின்சாரம் ஆகியவை அடங்கும். இதில் கச்சா எண்ணெய் மற்றும் இயற்கை எரிவாயு தவிர்த்து மற்ற அனைத்து துறைகளும் வளர்ச்சி கண்டுஉள்ளன.

அதிகபட்சமாக ஸ்டீல் உற்பத்தி 14.20 சதவீதம் அதிகரித்துள்ளது. பிற துறைகளின் உற்பத்தியை பொறுத்தவரை, நிலக்கரி 11.40 சதவீதம்; சிமென்ட் 6.10 சதவீதம்; உரம் 4.60 சதவீதம்; மின்சாரம் 3.10 சதவீதம்; சுத்திகரிக்கப்பட்ட பொருட்கள் 3 சதவீதம் அதிகரித்துள்ளது.