அ.ம.மு.க., பொதுச்செயலர் தினகரன் பேட்டி: 'தமிழகத்தில் மகப்பேறு மற்றும் சிறப்பு மருத்துவர்களின் பற்றாக்குறையைப் போக்க, பல்வேறு கட்ட போராட்டங்கள் நடத்தியும் செவி சாய்க்காத தி.மு.க., அரசு, தற்போது நேர்காணல் முறையில், அவசர கதியில் மருத்துவர்களை நியமிக்க வேண்டிய அவசியம் என்ன' என, மருத்துவர் சங்கங்கள் கேள்வி எழுப்புகின்றன. எதிர்க்கட்சித் தலைவராக இருந்தபோது, இதை எதிர்த்த ஸ்டாலின், முதல்வரான பிறகு அதே முறையை பின்பற்றுவது, மகப்பேறு மற்றும் சிறப்பு மருத்துவர்களை ஏமாற்றும் செயலாகும்.

அடுத்த வருஷம் தேர்தல் வருதே... கட்சியினர் சிபாரிசுகளை ஏற்று, மருத்துவர்களை நியமித்தால் தானே தேர்தல் வேலைகள் ஜரூரா நடக்கும்!

தமிழக பா.ஜ., பொருளாளர்எஸ்.ஆர்.சேகர் அறிக்கை:திருப்பரங்குன்றம் கோவிலுக்கு செல்ல 144 தடை. மதுரையில் மட்டுமல்லாமல், மாநிலம் முழுதும் தடை போட்டு, ஹிந்து பரிவார் அமைப்புகளை, தி.மு.க., அரசு கைது செய்திருக்கிறது. இதற்கு காரணம், முஸ்லிம்களை திருப்திபடுத்தி, அதன் வழியே, ஏற்கனவே தி.மு.க.,வுக்கு ஆதரவு கொடுக்கும் முஸ்லிம் ஓட்டுகளை, 2026ல் தக்க வைத்துக் கொள்ளத்தான். இதை, தி.மு.க.,வுக்கு ஓட்டு போடும் ஹிந்து வாக்காளர்கள் எப்போது புரிந்துகொள்ளப் போகின்றனர்?

அவங்க ஒரு காலமும் புரிஞ்சுக்க மாட்டாங்க... அதுவரைக்கும் திராவிட மாடல் வண்டி ஓடும்!

முன்னாள் முதல்வர் பன்னீர்செல்வம் ஆதரவாளர் மருது அழகுராஜ் அறிக்கை: தங்கள் கட்சி வளர்ச்சிக்கு பாடுபடாமல், கூட்டணிக்கு விஜய் வந்து காப்பாற்றுவார் என பழனிசாமியும், தேசிய ஜனநாயக கூட்டணிக்கு பழனிசாமி வந்து விடுவார் என பா.ஜ.,வும் நம்பிக் கொண்டு, காலத்தை விரயமாக்கி கடமை தவறுகின்றனர்.

இவரது தலைவர் பன்னீர்செல்வம் மட்டும், அவரது கடமையை சரியா செய்றாராமா?