டி.மஞ்சுளா, தோவாளை, கன்னியாகுமரி.

*நவராத்திரியைக் கொண்டாடுவது ஏன்?

வாழ்வில் வெற்றி பெற புத்தி(சரஸ்வதி), பணம்(மகாலட்சுமி), உடல்பலம்(துர்கை) ஆகியவை அவசியம். இவற்றை பெற நவராத்திரியை கொண்டாடுகிறோம்.

எஸ்.ஸ்ரீவித்யா, அபிராமம், ராமநாதபுரம்.

*சரஸ்வதி, மகாலட்சுமிக்கு நடுவில் விநாயகர் இருப்பது ஏன்?

வெற்றி பெற புத்தி, பணம் மட்டும் போதாது. தடையின்றி செயல்கள் நிறைவேற விநாயகரை நடுவில் வைத்து வழிபடுகிறோம்.

ஜி.சிவகாமி, முகப்பேர், சென்னை.

*சரஸ்வதி பூஜை, விஜயதசமி - இதில் புஷ்பாஞ்சலி நடத்த ஏற்ற நாள் எது?

விஜயதசமியன்று அம்பிகைக்கு கோயில்களில் புஷ்பாஞ்சலி நடத்துவர்.

ஸ்ரீ.ரமா, மாரத்தஹள்ளி, பெங்களூரு.

*அம்பிகைக்கு மட்டும் ஒன்பது நாள் விழா ஏன்?

அசுரர்களான மகிஷன், சும்பன், நிசும்பன் ஆகியோரை அழிக்க ஒன்பது நாள் அம்பிகை தவமிருந்தாள். விஜயதசமியன்று போரிட்டு வென்றாள். இதை ஒன்பது நாள் விழாவாக நடத்துகிறோம்.

சி.வந்தனா, பூந்தமல்லி, திருவள்ளூர்.

*நவராத்திரி விரதமிருப்பது எப்படி?

வெங்காயம், பூண்டை தவிர்த்து தினமும் மதியம் ஒருவேளை சோறு சாப்பிடுங்கள். பசி பொறுக்க முடியாதவர்கள் மட்டும் இரவில் பழம் அல்லது பலகாரம் சாப்பிடலாம்.

வி.கிஷோர், கங்கைகொண்டான், திருநெல்வேலி.

*நவராத்திரியின் போது புதிய தொழில் தொடங்கலாமா?

புதிய தொழில் தொடங்க கூடாது.

பி.ஈஸ்வரி, வடக்கிபாளையம், கோயம்புத்துார்.

*கொலுவில் எத்தனை படிகள் இருக்க வேண்டும்?

எப்போதும் ஒற்றைப்படை எண்ணில் இருக்க வேண்டும். உதாரணம் 1, 3, 5, 7, 9.

ஆர்.சிந்துஜா, கல்வராயன்மலை, கள்ளக்குறிச்சி.

*எந்த மாதம் எந்த நாளில் நவராத்திரி வரும்?

புரட்டாசி மாத அமாவாசைக்கு மறுநாள் பிரதமை முதல் நவமி வரையுள்ள ஒன்பது நாட்களும் நவராத்திரி.

கே.ஆர்த்தி, தேவதானப்பட்டி, தேனி.

*கொலு என்பதன் பொருள் என்ன?

கொலு என்றால் அழகு. அம்பிகையைச் சுற்றி எல்லா தெய்வங்களும் இருக்க, அவள் சிம்மாசனத்தில் காட்சியளிப்பதே கொலு அலங்காரம்.

எம்.காயத்ரி, கன்னாட்பிளேஸ், டில்லி.

*மூன்று தேவியரில் யாரை வழிபடலாம்?

கடவுளை பிரிக்க கூடாது. மூவரும் சேர்ந்த கோலமான ராஜராஜேஸ்வரியை வழிபடுங்கள்.